Israel läducunäta mućhuycachinanpämi willacun
11
Chaypïtam Tayta Diospa Ispiritun alawana wasinpa inti yalamunan läduman apäman.
Caypa puncunćhümi ishcay ćhunca pichayu (25) nunacunacta licälú.
Paycunaćhümi malcap puydïnin Azurpa chulin Jaazaniasta,
jinaman Benaiaspa chulin Pelatiastapis licälú.
2 Chayćhümi Tayta Dios niman:
“Má,
am wañucülla nuna,
uyalimay;
cay nunacunäpa śhunꞌunćhümari mana allincunalla muyuyan.
Paycunamari cay malcactapis mana allinta limapayalcan cay nil:
3 ‘Cay malcaca mancänümá cayan;
yaꞌanchicñatacmi aychänu sigüru cayanchic.
Chayurá ¿manachun muśhüpïta wasicunäta śhalcachinanchic üraña cayan imamá?’
nin.a
4 Chayurá am wañucülla nuna,
paycunap cuntran willacamuy.
Awari,
willacamü liy” nil.
5 Chaypïta Tayta Diospa Ispiritun pudiracaycamalmi niman:
“Yaꞌa Tayta Dios nishäta Israel läducunäman niycamuy:
‘Amcuna ima nipäcuśhayquitapis ima pinsapäcuśhayquitapis yaꞌa yaćhayämá.
6 Cay malcaćhu achca nunacunactamari wañülächinqui.
Jinantin cällicunätamá wañüśha nunacunawan juntälächinqui’ nil.
7 Chaymi yaꞌa Tayta Diosniqui ní:
Rasunpa,
Jerusalen malcam mancanu cayan.
Wañuchishayqui nunacunap ayancunañatacmi mancaćhu aychänu cayan.
Ñatac amcunactá aycha julücänümi Jerusalenpïta julülälishayqui.
8 Amcuna,
¿gïrraćhu cayta manchaculcanquichun?
Ajá,
chayurá gïrractamá amcunaman caćhämuśhä.
Yaꞌa Tayta Diosmi niyá.
9 Cay malcäpïta alapaculculmá juc nasyuncunap maquinmanlä jitaycälälishayqui.
Chaynüpamari tincüniquiman cäraycälishayqui.
10 Ispädawanmá wañupäcunqui;
Israel lädup lindïrunćhümá yaꞌa cäraycälishayqui.
Chaynüpamá yaꞌa Tayta Dios caśhäta yaćhapäcunqui.
11 Cay malcaca manañamá sigüru mancanüñachu canꞌa;
nï amcunapis sigüru aychanüñachu capäcunqui.
Aśhwanpa Israel läducunap lindïrunćhüñamá yaꞌa cäraycälishayqui.
12 Chaynüpamá Yaꞌa Tayta Dios caśhäta yaćhapäcunqui.
Amcuna nishämannüchu manamá cawsapäcunqui,
camachishätapis manamá lulaycälinquichu,
sinuꞌa muyülïniquićhu cä nasyuncunäpa custumrincunactam atichipäcunqui” nil.
13 Chay nimäśhanta willacuyaptïmi Benaiaspa chulin Pelatias wañülun.
Chayćhümi pampäman juclla lawacacälul yaꞌa mañaculá:
“¡Tayta Diosllay!
¿Ash,
quïdä Israel läducunätapis camacalpülunquichun imamá?”
nil.
Muśhü śhunꞌuyü capäcunanpämi nin
14 Chayćhümi Tayta Dios niman:
15 “Wañucülla nuna,
Jerusalenćhu yaćhäcunämi malca-masiquicunapi,
aylluyquicunapi,
jinantin Israel läducunäpi nipäcun:
‘Paycuna Tayta Diospi calućhüñam cayalcan.
Chaymi yaꞌanchictaña cay malcacta tücäninchicpä uycamanchic’ nil.
16 “Chaymi paycunacta ninqui:
‘Tayta Dios caynütam nin:
Masqui calu nasyuncunaman alapacüluptïpis,
juc nasyuncunaman chiꞌichiptïpis,
chayćhu quiquïtacmi alawana wasinu caycuśhä’ nil.
17 Chaynütacmi ninqui:
‘Tayta Diosmi nin:
Chay chiꞌisha capäcuśhayqui malcacunäpi,
nasyuncunäpi yaꞌami cutiycälichimul Israel lädu allpacta uycälishayqui’ nil.
18 “Paycuna chay malcaman cutipäculmari lluy mana allin lulaycunacta,
millachicuy cäcunacta chincachipäcunꞌa.
19 Chaymi juc muśhü,
allin śhunꞌucta yaꞌa uycuśhä;
aśhta muśhü ispirituctalämari uycuśhä.
Chay lumi śhunꞌunta wicapalculmá llampu śhunꞌuyüman muyuycachishä.b
20 Chaymari nishäta lulapäcunꞌa;
camachishäta cäsuculcanꞌa.
Jinaman paycuna malcämi capäcunꞌa;
yaꞌañatacmi Tayta Diosnin caśhä.c
21 Ñatac chaynu millachicuycunaman muyuculcul millachicuyta luläcunätá chay lulayninmá cunca cuchuynin caycunꞌa.
Yaꞌa Tayta Diosmari niyá” nil.
22 Chaypïta chay querubincunaca laplanwan pälipäcuptinmi ruydacunäpis paycunawan lipäcuña.
Chaypa jananćhüñatacmi Israel lädu Tayta Diospa sumä caynin cayäña.
23 Chay Tayta Diospa sumä cayninmi malcap ćhawpinpïta pallaculcul malcap inti yalamunan lädu ulꞌućhu śhaycülun.d