3 “Chaymi am wañucülla nuna,

ipiquita allichacunayqui prïsu puśhaśhanu licunayquipä.

Chaynu licunqui muyunpa paycuna licayalcäśhuptiquimá.

Chay caśhayquipïta yalulcul juc läduman licuy.

Chaynu lulaptiqui ichapis tantiaculcanman cullu linli cayalcalpis.

4 Prïsu yaluyänu muyunpa lluy licayalcäśhuptiqui ipiquita juluy.

Tardinpañatacmi lluy licayäśhuptiqui prïsu puśhaśha cayäcänu yalunqui.

5 Chay pilacta lluypa ñawpäninćhu ućhculculmi chayninpa yalunqui.

6 Tutalpuyaptinñamá lluy apaśhayquita śhawaculcul lluypa ñawpäninćhu yalunqui.

Malcayquita mana licanayquipäñatacmi cärayquita täpacunqui.

Chaynu lulaśhayquimá Israel läducunäta ima pasananpä caśhantapis tantiachinꞌa” nil.

7 Chay nimäśhantanümi yaꞌa lulayculá:

Muyunpam prïsu puśhaśha cayäcänu lluypa ñawpäninćhu ima cänïcunactapis jululá.

Tardinpañatacmi pilacta ućhcülá.

Tutalpuyaptinñatacmi lluypa ñawpäninćhu ima cänïcunactapis śhawacuśha yalulá.

8 Chay walantinñatacmi Tayta Dios niman:

9 “Am wañucülla nuna,

chay cullu linli Israel läducunämi tapupäcuśhunqui:

‘¿Imanayanquitan?’

nil.

10 Chaynu tapuśhuptiquim ninqui:

‘Tayta Diosmi nin:

Jerusalenćhu mandacücäpa,

jinaman jinantin Israel läducunäpämi cay willacuyca cayan’ nil.

11 Chaynütacmi ninqui:

‘Yaꞌa Ezequielmi juc licachïnu amcunapä cayá.

Yaꞌa lulaśhänümá amcunawan pasapäcuśhunqui;

prïsu puśhaśhamari capäcunqui.

12 Amcunap mandacüniquipis tutalpuptinmi ima cänintapis śhawaculcul yalunꞌa.

Ipinwan yalunanpämari pilacta ućhcupäcunꞌa;

muyülïninćhu cäcunäta mana licananpämi cärantapis täpacunꞌa.

13 Payman trampacta yaꞌa ćhulaycüluptïñatacmi trampaman palpuptin Babiloniaman prïsucta puśhachishä.^b

Chay nasyunta manamá licanꞌachu;

chay nasyunćhütacmá wañunꞌa.

14 Paypa lluy yanapänincunactapis,

pilyänincunactapis jinantin lädumanmi chiꞌichishä;

ispädäta jululculmi aticaćhaśhä.

15 Chaynu juc nasyuncunaman chiꞌichiptïmi,

jinantin allpäman alapacüluptïmi yaćhapäcunꞌa yaꞌa Tayta Dios caśhäta.

16 Waquincunactá gïrraćhu,

micuy wanayćhu,

ishyaywan mana wañupäcunanpä caćhaycuśhämi.

Chaymi paycuna may nasyunman ćhäśhanćhüpis millachicuy lulaycunacta lulapäcuśhanta willaculcanꞌa.

Chaynüpamá yaꞌa Tayta Dios caśhäta yaćhapäcunꞌa’ ” nil.

17 Chaypïta Tayta Diosmi yapa niman:

18 “Am wañucülla nuna,

micuśhayquićhu manchäśhanu chucchuśhtin micuy;

upyaśhayquićhüpis jucmanyäśhanu,

llaquishanu upyay.

19 Jinalcul chay malcaćhu cäcunätam ninqui:

‘Jerusalenćhu yaćhäcunäta,

Israel lädućhu yaćhäcunätam Tayta Dios nin:

Amcuna supayapachinaculcäśhayquipïtamá miculpis manchacuśhallaña micapäcunqui;

upyalpis jucmanyäśhallaña upyapäcunqui.

Jinantin allpätamá calanllanta caćhaycülunꞌa.

20 Lluy yaćhaśhayqui malcacunämari camacaycüśha canꞌa;

jinantin nasyunmi pasaypi pulumäśha canꞌa.

Chaylämi yaꞌa Tayta Dios caśhäta yaćhapäcunqui’ ” nil.

21 Chaypïtam Tayta Dios niman:

22 “Am wañucülla nuna,

má niycamay,

¿imaninanmi jinantin Israel lädućhu:

‘timpuca pasaptinpis suyñućhünu willacuśhancunacá manamá lulacacunchu’ nil nipäcuśhan limayca?^c

23 Canan má,

caynüta niycamuy:

Tayta Diosmi nin:

‘Chay limayta chincächishämi.

Jinantin Israel lädućhu manañamá imaypis chaynu limapäcunꞌañachu.

Aśhwanpa chay muyunca jiꞌacaycayämunñamá;

suyñućhu licachishancunaca lulacacunanpä janällayquićhüñamá cacuyan.

24 Israel lädućhu manañamá canꞌachu “Tayta Diosmi suyñunpa-cama niycaman” nïcuna,

nïtac shimi mishquichicü willacücunapis canꞌañachu.

25 Cananꞌa yaꞌa Tayta Diosmi limaśhä;

ima nishäpis lulacacunꞌamá.

Cullu linli malca,

manam anchap unaychu canꞌa;

cawsapäcuśhayquicamam ima nishäcunapis lulacacuśhanta licapäcunqui.

Yaꞌa Tayta Diosmari niyá’ ” nil.

26 Chaypïta Tayta Diosmi yapa niman:

27 “Wañucülla nuna,

Israel läducunaca limayalcan:

‘Ezequielman licachishancunaca calu śhamü watacunapälämi cayan.

Pay willacuśhanca imayläćhá lulacacunꞌa’ nilmi.

28 Chaymi lilcul ninqui:

‘Tayta Diosmi nin:

Limaśhäcunaca canan pachamá lulacacunꞌa.

Lluy nishäcunaca nishänümá lluy lulacacunꞌa’ nil.

Yaꞌa Tayta Diosmari niyá” nil.