Tayta Diospa sumä cayninmi alawana wasipïta licun
10
Chaypi licalcuśhäćhümi querubin anjilcunap caśhanpa altunninćhu täcunapä dispächunu cayäta licälú.
Chayꞌa zafiro lumipïtanu luläśham cacuña.a
2 Chayćhümi lïnupi müdanawan müdacuśha nunacta Tayta Dios nin:
“Querubincunap lulinćhu ruyda cäcunäman yaycuy.
Chayćhu śhanśha cäcunäta maquiquiwan pućhulcul jinantin malcäman wacamuy” nil.b
Chayćhu licapayaptïmi chay nuna ruydap lulinman yaycülun.
3 Canan má,
alawana wasip sur lädunćhüñatacmi querubincuna cayalcäña.
Chayman chay nunaca yaycüluptinmari luli patyunman pucutay juntälun.
4 Jinaptinmi querubincunap jananćhu cä Tayta Diospa sumä caynin alawana wasip puncunman licun.
Pucutaycäñatacmi alawana wasiman juntälun;
patyunpis Tayta Diospa sumä cayninwanmari chipipicyäla.c
5 Chay querubincunäpa laplanpa suynaynincunactapis waśha patyücamamá uyaliñanchic;
sumä munayniyu Tayta Diospa limalpamuyninnümá caculläña.
6 Chay lïnuwan müdacüśha nunactañatacmi Tayta Dios nin:
“Querubincunap ruydancunaćhu cäcäman yaycuycul śhanśhacta pućhuy” nil.
Niptinmi yaycuycul ruydacuna caśhancäćhu śhaycucuycuña.
7 Chayćhu jucnin querubinmi maquinta chacchaycul śhanśhacta pućhulcul lïnupi müdacuśha nunaman uycülun.
Payñatacmi ćhasquiycul chaypïta yalucun.
8 Chay querubin anjilcunap laplanpa lulïninćhüñatacmi nunap maquinnu cayäña.
9 Licalcuśhäćhümi querubincunäpa lädunćhu tawa ruydacuna cayalcäta licälú;
juc querubinćhu-camam juc ruyda caña.
Chay ruydacunaca crisolito nishan sumä aläja luminümi chipyayalcäña.
10 Chay tawan ruydacunämi chay nilä-camalla capäcuña;
ruydap lulïninćhu-camam chacanacüśha ruydanu-cama muyuyäña.
11 Cuyuliptinñatacmi tawan läduman lipäcuña;
manamá muyulcapämuñächu.
Umaca mayman lishantamá juccunäpis lipäcuña;
manamá muyulcapämuñächu.
12 Lluy waśhancunaćhu,
maquincunaćhu,
laplancunaćhu,d
tawan ruydancunaćhüpis ñawip juntäśhallamá lluy-lluy cayäña.
13 Chayćhu ruydacunäta “ruyday”e nishantam uyalïlú.f
14 Chay querubincunaca tawa cärayü-camam capäcuña.
Jucnin cäranmi querubinpa cärannug caña,
juccäñatac nunap cärannu,
juccä liyunpa cärannu,
juccä ancap cärannu caña.h
15 Chay querubincunaca quiquin Quebar mayup patanćhu licaśhäcämari capäcuña.i
Chayćhümi janayman ishpicalcäliña.
16 Chaynu querubincunaca lipäcuptinmi ruydacunäpis lipäcuña.
Janayman linanpä laplancuna quićhacacuptinpis ruydacunaca paycunawanmi liña.
17 Querubincunaca śhaycapäcuptin ruydacunäpis śhaycapäcuñämi.
Janayman ishpiptinpis ruydacunäpis ishpipäcuñätacmi.
Chaynu capäcuña chay cawsä querubincunäpa ispiritun ruydacunäćhu cayalcaptinmari.
18 Chaypïtam Tayta Diospa sumä caynin alawana wasip yaycuna puncunpïtalä pallaculcul,
querubincunap janäninman licuña.
19 Licapayällaptïmi laplanta quićhaycul allpäpïta querubincunaca päliculcäña.
Chay ruydacunäpis paycunawan cuscatacmi liculcäña.
Chaycuna Tayta Diospa alawana wasinpa inti yalamunan lädu puncunćhüñatacmi śhaycacaycäliña.
Paycunap jananćhüñatacmi Israel läducunap Tayta Diosninpa sumä caynin cayäña.
20 Chaycuna quiquin Quebar mayup patanćhu Israel läducunap Tayta Diosninpa lulinćhu licaśhá cawsäcämi capäcuña.
Chaymi querubin anjilcuna caśhanta tantialú.
21 Chaycunamá tawa cärayu,
tawa laplayü-cama capäcuña.
Chay laplanpa lulïninćhüñatacmi nunap maquinnu maquiyü-cama capäcuña.
22 Chay cärancunañatacmi Quebar mayup patanćhu licaśhänülla caña.
Chaycuna chay cuscallam puntaman-cama lipäcuña.