Chalapacuna cä Tayta Diosmanmi alcaycun
3
Alef1 Piñacuyninćhu Tayta Dios mućhuchiptin
yaꞌamá ñacayta pasäca cayá.
2 Paymá sumä tutapäcäpa pulichimäla;
paymá acchi mana caśhanpa puśhamäla.a
3 Walan-walanmá yapalcul-yapalcul
maquinta ćhulaycaman.b
Bet
4 Aychätapis,
aychäpa utantapis pasaypictamá awquishyächiman;
tullücunactapis ñutuypamá pawäman.c
5 Muyülïnïman piñacuywan llaquicuyllawanmá cunćhäman.d
6 Una-unayña wañücunätanümá tutapäcäćhu caycachiman.e
Guimel
7 Mana ayinäpämá muyülïnïman cunćhäman;f
sumä llasä-cama cadinacunawanmá ćhänäman.
8 Masqui yanapämänanpä mañacuptïpis,
ayaycaćhaptïpis
pay manamá ayacuynïta uyaliycamanchu.g
9 Pulinäcunacta paymá labräśha lumicunawan wićhäman;
pulishá caminücunactamá wicsu-wicsuman muyüchin.
Dalet
10 Chapatamänanpä ucumälinümá pay licapäman;h
pacacüśha liyunnümá pay licapäman.
11 Caminupi japächalcamalmá ticshiy pawäman;
pasa-pasaypictañamá caćhaycäman.
12 Flïcha ćhächicunta alistayculmá
ćhächimänanpä apuntayäman.
He
13 Chay flïcha ćhächimäśhanmi
śhunꞌücama yaycülun.i
14 Jinantin malcäpä asipänanmanmá licalïlú;
anyaśh muyun jamuyayninwan taquipänanmanmá muyülú.j
15 Ćhacćhä llaquiwanmá ñitïchiman;
ajinjuctamá upyächiman.k
Vav
16 Puntash lumiwanmá quilücunactapis paquïman;
ućhpäćhu anćhaycaćhacunäcamam camacaycäman.
17 Jawca cawsaycuyta manañamá talïchu;
cushisha cawsaytapis manañamá lisiycüñachu.
18 Chaynu cayalmi nilá:
“Callpá manañamá canchu.
Tayta Diosman imapäñamá chalapacuśhä” nil.l
Zayin
19 Ñacayćhu,
llaquićhu pulishäta yalpalcullayꞌari;
ćhacćhacu ajinjucta uycamäśhayquitamá yalpalcullá.
20 Chaycuna umalläćhümá muyuyan;
cawsaynïpis manañamá cawsaychu.
21 Ñatac śhunꞌüćhu tantiapacümá;
chay tantiapacuśhäcämi cawsapacachiman.
Jet
22 Tayta Diospa llaquipayninpam mana camacaycuśhachu canchic;
cuyacuynin imaypis manamari pawanchu.
23 Llaquipaynin walan-walan muśhümá caycun;
Tayta Diosllay,
sumä chalapacunamá am canqui.m
24 Chaymi llapan śhunꞌüwan ní:
“Tayta Diosmi
lluy imapïtapis yaꞌapá mas ćhaniyünin.
Chaymi payllaman chalapacú” nil.n
Tet
25 Tayta Diosman chalapacücunätá,
payta ashiycunätá pay yanapaycunmi.o
26 Tayta Dios salbaycamänanchicpä
mas allin,
upällalla alcaycuymá.
27 Yügucta apäcänu müsu caśhanpïta
pasinsiawan caycuyta yaćhaymá mas allin.
Yod
28 Tayta Dios mućhuycachiptin
nunaca upällallamá alcaycunan.
29 Pampäcama uyshuycuśhun;
chaynu lulaycuśhá ichapis yanapaycamachwan.
30 Cäraćhu lapyamaptinchic,
juc lädu cäranchicta camaycuśhun;
imacta niycamaptinchicpis upällallamá ćhasquicunanchic.p
Caf
31 Tayta Dios manamá
wiña-wiñaypächu jitämäśhun.
32 Ñacachilpis jatu-jatun cuyacuyniyu calmi
Tayta Diosꞌa llaquipaycamanchic.q
33 Paypa munaynin manamá
nunacunäta llaquichiychu,
ñacachiychu.
Lamed
34 Waquincuna cay allpäćhu prïsu cäcunäta
usuchipäcuśhanta Tayta Dios licaycunmi.
35 Chaynütac nuna-masin allinpä licaycuśha
cananta iwipäcuśhantapis licayanmá.
36 Cäraycüca allichaycuśhanćhu iwishantapis licayanmi;
caycunacta Tayta Dios manamari awniycunchu.
Mem
37 Tayta Dios mana niycuptinꞌa,
¿mayanmá imapis lulaycuśhä cananpä niycunman?
38 ¿Manachun allincäwan mana allincäpis
altućhu cä sumä munayniyüca niycuptinlä lulacacun imamá?r
39 Chayurá juchanchicpi cay cawsayninchicćhu ñacayal,
¿quijacuśhunchun imamá?
Nun
40 Imanuy cawsayninchic caśhantapis tuquictari licacuycuśhun;
Tayta Diosmanꞌari caśhan cutiycuśhun.
41 Sïlüćhu cä Tayta Diosmanꞌari maquinchicta chacchaycul
llapan śhunꞌunchicwan mañacuśhun caynu:
42 “Cuntrayqui śhalculculmi mana allinta lulapäculá.
Chaymi mana pampachaycälimälanquichu.s
Samej
43 “Sumä piñacüśha cayalmá aticaćhälälimälanqui;
mana llaquipayculmá wañülächimälanqui.
44 Mañacuynïcunacta mana uyaliycunayquipämá,
pucutaycunäman pacacuyculanqui.
45 Lluy malcacunäpa puntanman
millachicuy anlactanümá jitaycälälimanqui.
Pe
46 “Lluy ćhïnicünïcunamá yaꞌacunapi mana allinta
limapäcunanpä äśhaycaćhapäcun.
47 Yaꞌacuna manchacuyllaćhu,
trampacunallaćhümá cayalcá;
pampaman muyüchisha,
camacaycüśhamá cayalcá” nil.
48 Cuyay malcá mana cäman muyüchisha caśhanta
licaptïmá wiꞌinïpis mayunülä unyaycun.t
Ayin
49 Waꞌayta manañamá ñawí manalcunchu;
mana jamayculñamá waꞌay-waꞌay cayá.
50 Sïlüćhu cä Tayta Dios licalcamul
licaycamänancamamá waꞌayá.
51 Jerusalen malcaćhu walmicunaca ñacapäcuśhanta
licaptïmi śhunꞌüpis nanaypa-nanaycaman.
Tsade
52 Pälï pishuctanümá yanꞌalpi
ćhïnicünïcuna aticaćhapäman.
53 Cawsayätamá püsuman jitalpaycäläliman;
janänïmanmá lumiwan täpäläliman.
54 Chayćhu umäcama yacup ñitïshamá cayá;
chayćhümi:
“Wañucuśhäñaćh” nilá.u
Qof
55 Tayta Diosllay,
pasaypi luli-lulićhu
cayalmá amllacta ayacamulac.v
56 Ayacuylläta am,
uyaliycallämälanquimá;
mañacuylläta ćhasquiycallämälanquimá.
57 Ayacamuptí-pacham aśhuycamulanqui.
“Ama manchacuychu” nilmá niycallämälanqui.
Resh
58 Am Tayta Diosllämi licaycallämanqui;
anmi,
cawsaylläta libraycallämanqui.
59 Tayta Diosllay,
ima mana allin lulamäśhancunactapis licamälanquimá;
allin caśhayquimannuꞌari allichaycallämay.
60 Cutichicuypi wañupaculcäśhanta am tantiayanquimá;
yaꞌapa cuntrá imacta lulay munaśhanta am yaćhayanquimá.
Shin
61 Tayta Diosllay,
am yaćhayanquimá imanuy palapämäśhancunacta;
imacta lulapämänanpä limanaculcäśhantapis yaćhayanquimá.
62 Ćhïnicünïcuna cunträmá masqui
shimin lulillanćhüpis limayta ćhapayalcan.
63 Imacta lulapäculpis jamuyapämäśhanta licaycuyꞌari;
taquincunaćhüpis burlacuyninwanmá taquipäcun.
Tav
64 Tayta Diosllay,
paycunacta
lulapäcuśhanman tincütari uycüluy.
65 Pasaypi lumi śhunꞌuctari caćhaycüluy;
pasaypi mana allintari paycunaman ćhaycachiy.
66 Tayta Diosllay,
piñacuyniquićhu aticaćhäluy;
cay allpäpïta chincananpä camacaycüluyꞌari.