Juchapïtam Tayta Dios sumä-sumä piñacun
2
Alef1 Tayta Dios sumä-sumä piñacuyninćhümá
tuquish Sionta tutapäcäman jitalpuycülun.
Israelpa tuquish-tuquish malcanmá
sïlüpi pampäcama jitalpaycämuśhanu cayan.
Sumä piñacuyninćhu manamá llaquipayculachu alawä wasintapis.a
Bet
2 Tayta Dios piñacuyninćhu mana llaquipayculmá
Jacobpa lluy wasincunacta camacaycülun.
Sumä piñacuyninćhümá tuquish Judapa
pacacunanpä sumä cänincunacta camacaycülun.
Mandacünintapis,
puydïnincunactapis pinꞌaymanmá ćhulaycülun.
Guimel
3 Sumä piñacuyninćhümi Israelpa
jatun munayninpis mana cäman muyülun.
Ćhïnicünincunawan pilyayta allacuycuyaptinmá,
Tayta Dios manaña yanapayculachu.
Nina latayänümá Jacobpa malcancunaćhu
ima cänincunactapis lluy camacaycülun.
Dalet
4 Ćhïnicünin-yupaymá flïcha ćhächicunta Tayta Dios alistaycul
allï maquinwan tacyalpachin.
Tuqui allin cäcunäta cuntran-yupaymá lluy camacaycülun.
Piñacuynin sumä latäluptinmá
ama-pacha nishan Sionpa wasincunacta camacaycülun.
He
5 Ćhïnicüninnu licalilculmá Tayta Diosꞌa Israelta camacaycülun.
Lluy palasyuncunactawan sumä sigüru
cänincunactapis pampamanmá muyüchin.
Tuquish Juda läduman mas-mas llaquicuyllactawan
waꞌacuyllactañamá ćhaycachin.
Vav
6 Wirtaćhu cä chucllactanümá alawana wasintapis
pampaman muyüchin.
Lluy fistacunactapis,
jamana muyun lulapäcunanpä
cäcätapis lluyñamá unꞌälälichin.b
Piñacuynin walayaptinmá mandacücätawan
sasirdüticunätapis juc läduman ćhulaycülun.
Zayin
7 Uycuna patacninta Tayta Dios manamá licaytapis munanchu.
Carpantapis caćhaycülunmá.c
Palasyunpa murällancunactapis
ćhïnicünincunap maquinmanmá ćhulaycülun.
Paycuna fistaćhünülämá Tayta Diospa
alawana wasinćhu apaliyalcanpis.
Jet
8 Tuquish Sion malcap murällancunacta
pampaman muyuchinanpämá Tayta Dios camachila.
Camacaycünanpämá tupunawan tupuycul camachila;
mana llaquipayculmá pay camacaycüla.
Malcap waśha lädu pilancunactamá mamay-taytayta waꞌachin;
luli lädu pilancunactapis awćhuchinmá.
Pulantamari camacaycülun
Tet
9 Malcap puncuncuna cućhpächishañamá cayan.
Tayta Diosmá puncuncunap wićhacuncunactapis paquiypa pawälun.
Juc nasyuncunaćhüñamá mandacüninpis puydïnincunapis cayalcan.
Manañamá yaćhachicuypis canñachu;
willacücunäpis Tayta Diospi willacuycunacta
suyñunpa-cama manañamá ćhasquipäcunchu.d
Yod
10 Tuquish Sionćhu yaśhacunäpis upällañamá pampäćhu täcuyalcan.
Umancunaman ućhpacunacta jillpucaycälilmá
shicacü müdanacunawan müdacüśha cayalcan.
Jerusalenćhu lasac wamlacunaca
pampäcama uyshucälälishamá cayalcan.
Caf
11 Waꞌayaptí ñawïpis manañamá ñawichu;
śhunꞌüpis manañamá śhunꞌuchu.
Cuyaśhá malcá pampaman muyüchisha caśhanta licayaptïmari,
callpäpis manaña mayćhu caśhanpis canñachu.
Caminucunäćhu uchuchäcunälla,
ñuñücuna wañulpuyalcäśhanta licayaptïmá
mana callpayüña muyüllá.
Lamed
12 Paycunamari mamancunacta nipäcun:
“¿Mayćhümi ima tantallapis micunapä,
imallapis upyanapä cayällan?”
nil.
Gïrraćhu wañücänümá malcap caminuncunaćhu cućhpälälin.
Wañulpuyalcalmá mamanpa malaynincunaćhu pasacalpälin.
Mem
13 Tuquish Jerusalen,
¿imanicmanmá?
¿Imawanmá tincuycachicman?
Umricta manalä lisï Sion wamla,
¿cunsuylaycunacpä imawanmá tincuycachicman?
Jatu-jatun lamarcänümá ñacayniquicuna sumä-sumä cayan.
¿Mayanmá allinyaycachishunquiman?
Nun
14 Willacüniquicuna yanꞌal casqui willacuycunactamá willapäcuśhulanqui.
Juchayquicunacta licachishuptiquiꞌa,
manamá prïsu puśhaśha canquimanchu cala.
Yanꞌal willacuycunacta willaśhuśhayquiwanmá
quirichipäcuśhulanqui.e
Samej
15 Caminucunäpa pulïcunämi amta licapaycul
asipayninwan maquintapis tällapäcun.
Am tuquish Jerusalenta jamuyayninwanmi wishyaśhtin
umantapis aywipäcun:
“¿Sumä tuqui-tuqui malca;
jinantin allpäta cushichï malca,
nishan malcälächun caynu cayan imatá?”
nil.
Pe
16 Mana allinniquita limapäcunanpä
lluy ćhïnicüniquicunamá äśhaycaćhapäcun.
Jamuyayninwanmi quiluntapis lawćhićhicyachishtin nipäcun:
“Cayꞌari lacsacalpunchic.
Cay muyuncätamá wañuy-wañuy alcayculanchic.
Cananmi ichá licaycunchicña” nil.
Ayin
17 Imam lulanancätam Tayta Dios lulaycula.
Una-unaypïña lulananpä caśhancätamá canan lulaycula.
Mana llaquipayculmá camacaycülun.f
Ćhïnicüniqui asipäśhunayquipämá caćhaycüśhulanqui.
Ćhïnicüniquicuna sumä munayniyu cananpämá Tayta Dios camachila.
Tsade
18 Nunayquicunamá yanapaycunanpä Tayta Diosta
llapan śhunꞌunwan mañaculcan.
Tuquish Sion,
tutay muyun waꞌaśhayquica mayunu lichun.
Ñawiquicuna uchuyllapis mana jamayculꞌari waꞌapäcuchun.
Qof
19 Śhalcuculcul tutanpa mañacuy;
täpäcunaca täpayta allaycuptin-cama mañacuy.
Yacucta jićhaycücänuꞌari śhunꞌuyquićhu cäcunäta
Tayta Diosman willaycuy.
Payman maquiquita chacchalcul chuliquicuna
micuypi caminucunäćhu mana wañupäcunanpä mañacuy.
Resh
20 Tayta Diosllay,
ima lulaśhayquitapis tuquictari licaycuy.
¿Caytanuꞌa mayantamá lulälanqui?
¿Quiquin ishyacuśhan wawincunacta
mamancuna micapäcuśhanca allinchun imatá?
¿Tayta Diospa alawana wasinćhu sasirdüticunäwan,
willacücunaca wañuchishachun capäcunꞌa imamá?g
Shin
21 Müsucunapis awquishcunapis caminucunäćhümá
wañüśha maśhtalayalcan.
Wamlacunapis,
müsucunapis ispädawanmá wañülälin.
Sumä piñacuśhayqui muyuncäćhümá wañüchinqui;
mana llaquipayculmá camacaycülunqui.
Tav
22 Fistaman ayachimücänümá maypïñapis
manchay nunacunäta juntuycämunqui.h
Tayta Diosllay,
piñacuyniqui muyuncäćhu manamá
mayanpis cawsayniyu quïdalachu.
Cuyacuywan ishpichicuśhäcunäta,
yaćhachicuśhäcunäta ćhïnicünïcunamá camacaycülun.