Ćhïnicünincunactam Tayta Dios mućhuycachin
63
¿Mayanmá Edom lädupïta śhamüca?
¿Mayanmá Bosra malcapïta murädu müdanayu śhamüca?a
¿Mayantá sumä munayninwan tuquish müdanayülä śhacayämun?
“Rasuncällacta limä yaꞌa Tayta Diosmari cayá;
munaynïwan salbaycümi śhayämú”.
2 ¿Imapïmi müdanayqui puca cayan?
¿Imapïmi üba apchinaćhu jalücäpanu cayan?
3 “Awari,
yaꞌa japallämi üba apchinaćhu jalulá.b
Malcacunäpïtá manamá mayanpis yanapapämälachu.
Piñacuynïćhümi ćhïnicünïcunacta übactanu jaluypa pawälá;
rabyacuynïćhümi ñitiypa pawälá.
Jinaptïmi yawarnin müdanäman paćhcäman;
chaymari müdaná lluy anlälun.c
4 Cutichicuná muyunca ćhämunñamá.
Malcäta libraycuná wataca ćhämunñamá.
5 Licaycaćhaptí yanapaycamäní manamá mayanpis calachu.
Chaynu mayanpis yanapaycamaní
mana captinmi umalläta aywicú.
Chayurá liclalläñamari llalliycachimäla;
piñacuylläñam callpanchaycamäla.d
6 Rabyacuynïćhümi malcacunäta jaluypa pawälá.
Piñacuynïwanmi shincächilá;
yawarninpis pampäpamá unyala”.
Israeltam Tayta Dios llaquipaycun
7 Tayta Diospa sumä llaquipaynintam imaypis yalpaläśhä.
Imaymanacta yaꞌanchicpä lulaycuśhanpïtam
Tayta Diosta alawaycuśhä.
Israelta sumä-sumä llaquipaycuśhanpïmi yalpaläśhä.
Sumä jatun llaquipayninmannu
llaquipaycamäśhanchicpïtam alawaycuśhä.
8 Tayta Diosmari nin:
“Rasunpa,
paycuna malcämi.
Paycuna manañamá ipanchapämanꞌañachu” nil.
Chaymi paycunacta Tayta Dios salbaycula.
9 Paycuna ñacapäcuptin paypis ñacalamari;
quiquinpa anjilninmi salbaycü śhamula.e
Llaquipayninwan cuyacuyninwanmari libraycula.
Śhalcalcachilmari malayllanćhu apaycula;
unaypïpis chaynümá yanapaycula.
10 Ñatac paycuna cullu linli-caycälilmi
Chuya Ispiritucta piñachipäcula.
Jinaptinmi ćhïnicüninmannu muyulcul
paycunap cuntran śhalcula.f
11 Chaymi punta timpućhu Moises
malcanta juluycuśhanta yalpälälil nipäcun:
“¿Mayćhümá Moisespacama uwishtanu
lamarcäpa pasachï Tayta Dios cayan?
¿Mayćhümá payman Chuya Ispiritun caćhaycamüca cayan?
12 Moises maquinta chacchalcuptin
¿sumä munayninwan lulachïca mayćhümá cayan?
¿Mayćhütá malcanpa ñawquin lamar yacucta
wicma-cayman quićhacachïca cayan?
¿Mayćhütá wiña-wiñaypä lisisha cananpä lulaycüca cayan?g
13 ¿Mayćhütá lamar ćhawpinpa malcanta pasachïca cayan?
¿Mayćhütá mana mitcacacullal pulï cawalluctanu
chunyäcäpa malcanta puśhaycüca cayan?
14 Jawca cä pampaman uywacuna lïcunätanümi
Tayta Diospa Ispiritun malcanta jawcacta michiycula.
Chaynüpa Tayta Dios malcanta puśhaycuśhanwanmari
sumä lisisha-lisishaman muyuycula” nil.h
Tayta Dios yanapaycunanpämi Israel mañacun
15 Tayta Diosllay,
janay pachäćhu
cä chuya sumä caśhayquipïta licaycälillämay.
¿Mayćhümá sumä munayniquiwan ancha-anchap cuyacuyniqui cayan?
¿Mayćhümá llaquipäcuyniqui cayan?
Icha ¿cuyacü caśhayquiwan llaquipayniqui camacälunñachun imatá?
16 Anmá Tayta Diosní canqui.
Masqui Abraham mana lisipämaptinpis,
Israel mana yalpapämaptinpis anmi Taytá canqui.
Anmi lluypa libraycüní imaypis canqui.
17 Tayta Diosllay,
¿imapïmá caminuyquipi pantälächimanqui?
¿Imapïmá amta manaña manchaculcänacpä
śhunꞌücunacta lumiyälälichimanqui?
Sirbïniqui Israelpa milaynincunacta
ampa caśhan-laycuꞌari cutiycamul yanapaycälillämay.
18 Chuya malcayqui ashllay timpullamá tücänin allpaćhu caycälila.
Cananñatacmi ćhïnicünïcuna chuya wasiquitapis jalutacälälin.
19 Imaypis mana mandapämäśhayqui malcanümi cayalcá.
Imaypis mana lisishayqui malcayquinümi cayalcá.