Śhamuptiquiꞌa ulꞌucunaca puntayquićhüćha chullupäcunman.^a

2 Sumä nina walayäca imactapis chulluchishannu,

yacuctapis timpuchishannümari canman.

Chayćha ćhïnicüniquicuna mayan caśhayquitapis tantiapäcunman;

juc nasyuncunäpis ñawpäniquićhu chucchupäcunman.

3 Mana alcapäcuśhá sumä-cama

lulaycunacta lulaśhtin unay jiꞌalpämuptiquimá

ulꞌucunaca puntayquićhu chucchülälila.

4 Am Tayta Dios lulaycuśhayquitanuꞌa

unaypïpis manamá mayanpis licapäculächu.

Chalapacüniquicunapä am lulaycuśhayquitanuꞌa

manamá mayanpis uyalipäculachu.^b

5 Allin tincüninmannu cushisha lulaycücunämanmá,

yaćhachishayquimannu cawsäcunämanmá

tincuycü am yalamunqui.

Mana caćhaycul juchaculcaptïñatacmi ichá piñacunqui.

Chaynu cayalcal ¿imanuypamá salbaculcäman?

6 Lluymi anlallaña cayalcá;

tincüllanman lulapäcuśhäcunapis millachicuy anla lataśhnümá cayan.

Chaquïsha lapinümá lluy palpälälí;

mana allinnïcunamá waywanu apäläliman.

7 Mayanpis amta manamá ayacamuśhunquichu;

yanapaycunayquipä manamá mayanpis licaćhacunchu.

Chaymi ipanchalälimälanqui;

mana allin lulaynïcunap maquinman jitaycälälimälanqui.

8 Chaynu cayalcaptïpis Tayta Diosllay,

anmi Taytá canqui.

Anmi wacuy luläca cayanqui;

yaꞌacunañatacmi mitulla maquiquićhu capäcú.^c

Ampa lulaśhayquimá lluypis capäcullá.

9 Tayta Diosllay,

sumä-sumäta yaꞌacunawan ama piñacuychu;

mana allin lulaynïcunapi amañari imaypis yalpalayaychu.

Lluy yaꞌacuna malcayqui capäcuśhäta licaycälillämayꞌari.

10 Chuya malcayquicuna pampaman

muyüchishamá cayalcan.

Pulumäśhañamá Sion cayan;

chunyäman muyüchishañamá Jerusalen cayan.

11 Sumä cä,

chuya wasiquićhu awquillücuna

alawaśhancunaca ninawan camacaycüśhamá cayan.

Lluy sumä allin ćhaniyücunaca pampaman

muyüchishamá quïdälun.

12 Tayta Diosllay,

chaynüta licayal,

¿manachun imallactapis lulaycunqui imatá?

¿Upällachun cayanqui imamá?

¿Pasaypichun uyshulächipämanqui imamá?