Ispiritunmi yaꞌawan cayan.

Paymari japächaycamäla:

wacchacunäman

allin willacuycäta willacunäpä,^a

llaquisha śhunꞌuyücunäta allinyaycachinäpä,

ćhänaläcunäta caćhaycachinäpä,

prïsu cäcunäta libraycunäpä.

2 Chaynütacmi japächaycamäla Tayta Dios

salbanan timpucta willacunäpä,^b

ćhïnicüninchicta Tayta Dios cutichicunan muyuncäta willacunäpä,

llaquićhu cäcunäta cunsuylaycünäpäpis.^c

3 Chaynütac japächaycamäla Sionćhu

llaquisha cäcunäta callpanchaycunäpä,

ućhpaćhu cayänantá umanpä tuqui aläja adurnucta uycunäpä,

llaquicuyćhu capäcunantá mishqui pirfüminu cushicuyta uycunäpäpis.

Chaymi paycunacta nipäcunꞌa:

“Sumä allin Roble lantanüpis allincäta luläcuna;

quiquin Tayta Diospa sumä cayninta

camalaycachipäcunanpä lantacuśhanca” nil.

4 Chaynütacmi pampaman muyuchisha

punta cäcunäta caśhan śhalcachinꞌa;

unayña pulumäśha cäcunäta muśhüpi śhalcachinꞌa;

pampaman muyüchisha malcacunäta allinman caśhan muyuchinꞌa;

punta milaycunäpïtaña pampaman muyüchisha cäcunätapis śhalcachinꞌamari.

5 Mana Israel läducunämá amcunap uwishniquicunacta michipäcunꞌa;

mana lisisha nunacunämá ćhaclayquicunacta,

üba lantayquicunactapis lulapäcunꞌa.

6 Amcunactamari “Tayta Diospa sasirdütincuna”,

“Tayta Diospa pudirnincuna” nipäcuśhunqui.

Nasyuncunäpa cänincunapïmi micapäcunqui;

paycunap sumä cänincunawanmi nunatucunqui.

7 Sumä pinꞌayćhu capäcuśhayquipïtamá,

usuchisha capäcuśhayquipïtamá tücäniqui

ćhasquishayquipi sumä-sumä cushiculcanqui.

Allpayquićhümá ishcay dübli mastalä ćhasquipäcunqui;

cushicuyćhümá wiña-wiñaypä capäcunquipis.

8 Tayta Diosmi nin:

“Tincüninman licaycuycäta cuyämi.

Suwacuycätawan mana allin lulaycunätañatacmi ichá ćhïnicú.

Chaymari malcäpa lulayninpi pägunta uycuśhä;

wiña-wiñaypämá paycunaman limalicuśhä.

9 Paycunap milaynincuna lluy nasyuncunäćhümá

alli lisisha-cama capäcunꞌa;

willcancunapis malcacunäćhümá lisisha capäcunꞌa.

Lluy licäcunämá tantiapäcunꞌa Tayta Diospa

allinpä licaśha milaycuna capäcuśhanta” nil.

10 Yaꞌañatacmi Tayta Diosćhu sumä-sumäta cushicuśhä;

Tayta Diosnïćhümá ancha-anchacta cushicuśhä.

Paymari salbaycuna müdanawan ćhulaycaman;

tincüninman licaycuycäwanmi catawannu pitwiycaman;

casaracü walaśhnümá ćhulanancunawan ćhulaycaman;

ütac casaranan wamlactanümá aläjacunawan ćhulaycaman.^d

11 Maynümi allpäćhu mujucunaca wiñamun,

wirtacunäćhüpis wïwamun,^e

chaynümi sumä munayniyu Tayta Dios lluy

nasyuncunap ñawquin allin tincüninman

licaycuycätawan alawaycuśha cayta chillquichimunꞌa.