Tayta Diosnuꞌa manamá Babiloniap taytachancuna canmanchu
46
¡Taytacha Bel unꞌulacuycunmi!
¡Taytacha Nebo pampämanmi palpülun!
Taytachancuna carga uywacunawan apaśhamari.
Chaycuna llasäcama captinmi uywacunaca pishipapäcullan.a
2 Lluy-lluymari pampäman palpülälin;
manañamá imanaytapis atipapäcunchu.
Aśhwanpam quiquin alawäcunäpis prïsu puśhaśha capäcun.
3 Jacobpa milaynincuna,
Israelćhu quïdäcuna uyalipämay:
Mamayquip patanćhu capäcuśhayquipïmari licayculac;
manaläpis näsimuśhayquipïmari ñawilläćhu caycachilac.
4 Yulä umäśha yaśhayänayquicamapis
jinallam amcunacta puśhaycuśhayqui.
Yaꞌami lulayculac;
yaꞌatacmi ñawilläćhu caycälichishayqui;
yaꞌamari yanapäśhayqui,
libraycuśhayquipis.
5 Amcuna,
¿mayanwanmá
tincuycachimanquiman?
¿Piwanmá iwalaycachimanquiman?
6 Waquincuna luncunpïtamari üructa julupämun;
balansaćhüñatac illayta tupupäcun.
Illaypi lulay yaćhäta ashilculñatacmi
juc taytachacta lulaycapunanpä niycun.
Jinalculmi chay taytachanpa puntanman
unꞌulacaycälin alawapäcunanpä.
7 Chaypi umrucalcälilmi apaculcan;
chay canancäman ćhulaycuptinmi
mana cuyupacul chayćhu quïdacun.
Maynu apalcaćhapäcuptinpis
imallactapis manamá limalinchu;
llaquicuynincunapïtapis manamá
mayantapis salbaycuyta atipanchu.b
8 Cuntran śhalcücuna,
caytari yalpapäcuy;
tantiaculcal pinꞌaculcay.
9 Punta timpućhu ima lulaśhäcunacta yalpapäcuyꞌari.
Yaꞌallamá Tayta Dios cá;
juc manamá mayanpis canchu.
Yaꞌanuꞌa manamari mayanpis canchu.
10 Imapis mana pasaśhancama śhamü timpucunaćhu
ima pasanancunactapis yaꞌallamá willaycú.
Lluy lulay munaśhäcunaca lulacacunꞌamá;
lluy munaśhätamá yaꞌa lulaycú.
11 Inti ishpimunan lädućhu cä nunactamá ayamú;
ancanüpis calupïtamá mandacü nunacac śhamunꞌa.
Paymari nishämannu lulaycunꞌa;
yaꞌa tantiaśhämannümari lulaycunꞌa.
12 Am,
pasaypi lumi śhunꞌuyücuna,
allincäpi calućhu cäcuna uyalipämay.
13 Tincünïman allin lulaynïcuna cayllaćhüñamari cacuyan;
manañamá calućhüchu.
Salbaycunäta manamá imapis manalcachimanmanchu.
Sionmanmi salbasyunnïta ćhulaycuśhä;
Israelmanmi sumä caynïta ćhulaycuśhä.