Babiloniam pampaman muyuna
47
Tayta Diosmi nin:
“Manalä umricta lisï Babiloniap wamla chulin,
dispächuyquipi jiꞌalpaycamul pulbüćhu täcuy.
Caldea lädućhu cä wamla,
pulbullañamá
täcunayqui,
dispächuyqui canꞌa;
manañamá imaypis ‘sumä
tuquish,
mana tupaycuna’ nipäcuśhunquiñachu.
2 Cananꞌa malayćhu tunaywan maćhcacta aꞌay.
Śhucupacuyquitawan llanquiquita julucuy;
müdanayquita altuman pallaculcul
cala caćhpalla mayucunäta chimpay.
3 Lluypa licaśham calallaña pulinqui;
pinꞌayniquitapis licapäcuśhunquiñamá.
Chaynu canayquicama cutichicüśhäpi
manamá mayanpis libraycuśhunquichu” nil.
4 Israelpa libraycünin sumä munayniyu
Chuya Tayta Diosmi nin:
5 “Caldeo lädućhu cä wamla,
tutapäcäman yaycuycul upälla täcucuy.
Manañamari mayanpis
‘nasyuncunap mandänin’ nishunquiñachu.
6 “Malcäwan piñacüśha cayalmi pinꞌayćhu
capäcunanpä jalutaculcul maquiquiman ćhulaycamulá.
Ñatac amꞌa manamá llaquipayculanquichu;
aśhta awquishnincunactapis llasä
yüguctanu ćhulculculmá ñacachilanqui.
7 Anmi nilanqui:
‘Wiña-wiñaypä mandacümi caśhä’ nil.
Ñatac caycunaman manamá tantiayculanquichu
nï imanuy camacänayquitapis musyalanquichu.
8 “Aychanpa munayllanta cuyä Babiloniab nasyun,
uyalimay;
dispächuyquiman chalapacüśham śhunꞌuyquićhu niyanqui:
‘Yaꞌanuꞌa manamá mayanpis juc canchu.
Yaꞌa manamá imaypis japanyäśha caśhächu
nï wawïcunapis wañunꞌachu’ nil.
9 Ñatac juc muyunllaćhümá
cay mana allincunaca ćhäśhunqui:c
Japanyälunquim jinaman mana wawiyümi licalïlunquipis.
Masqui maynu-maynu rüjacuyniquipis,
licacuyniquipis manamá manalcachinꞌachu.
10 “Chay mana allin lulayniquicunaman
chalapacüśha calmi:
‘Mayanpis manamá licamanchu’ nilanqui.
Yaćhayniquiwan tantiayniqui
pantächishuptiquimá śhunꞌuyquićhu nilanqui:
‘Yaꞌanuꞌa manamá mayanpis juc canchu’ nil.
11 Sumä ñacaymá anman ćhäśhunqui;
manamá ima rüjacuyniquicunawanpis manalcachinquimanchu.
Anman ćhämuśhuśhayqui llaquicuycäta
manamá atajaycuyta atipanquichu.
Mana pinsaśhayqui sumä
mana allincunamá unꞌaypi ćhäśhunqui.
12 “Má,
uchuyllayquipïta yaćhaśhayqui rüja,
lulayniquicunaćhu,
licacuyniquicunaćhu jinallari lulaycuy.
Ichapis allinyaycachishunquiman;
ichapis nunacunaca manchapäcuśhunquiman.
13 ¿Anchap limapäśhuśhayquicunäwan
pishipälunquiñachun imatá?
¿Mayćhümá chay sïlucunäta,
uyllurcunäta lical tantiäniquicuna cayan?
¿Mayćhütá imanuy canayquipäpis
quillan-quillan willacüniquicuna cayan?
Má,
paycunari ima pasaśhunayquipïpis salbaycälishunqui.
14 Paycuna nina lupaśhan
päśhänüllamá cayalcan.
Ninap walayninpïta manamá
cawsayninta salbaycuyta atipapäcunꞌachu.
Chay nina manamá muyülïninćhu
unupacunallapä cä śhanśhanüllapis canꞌachu.
15 Chaynümi tacshalla caśhayquipi
chalapacuśhayqui rüjayquicuna amcunawan camacanꞌa.
Munaśhanpa-camamari lluy liculcanꞌa;
mayanpis salbaycüniqui manañamá canꞌachu” nil.