Tayta Diosmi sumä cayninta Cirowan camalachicun
45
Tayta Diosmi japächaycuśhan mandacü Cirocta nin.
Paytamari allï maquinpïta puśhaycun
lluy nasyuncunaca payman uyshuycälinanpä,
mandacücunaca munayninpïta mana ayiculcänanpä,
sumä sigüru malcacunaca puncuncunacta quićhalayätaña caćhaycapäcunanpäpis.
Paytamari Tayta Dios nin:
2 “Am Cirop ñawpäniquitamá puntaśhä;
jatun ulꞌucunätapis pampamanmi muyuchishä;
brunsipi cä puncucunätawan jïrrupi cä
wićhacuncunactapis ñutuy-ñutuytamá luläśhä.
3 Israelpa Tayta Diosnin caśhäta yaćhanayquipämi
pacäśha cäcunäta uycuśhayqui.
Śhutiquip ayaśhüniqui yaꞌa caśhäta yaćhanayquipämi
mayanpis mana talishan cäniyücunäta uycuśhayqui.
4 “Sirbïní Jacobta cuyaśhä-laycum,
aclacuśhá Israel-laycum śhutiquip ayalac;
mana lisiyämaptiquipis sumä lisisha
śhutictamari ćhulayculac.
5 Yaꞌallamá Tayta Dios cayá;
manamá juc canchu.
Yaꞌapïta juc dios manamari canchu.
Masqui mana lisiyämaptiquipis
yaꞌami masïsucta tacyaycachishayqui.
6 Chaynüpam inti ishpimunan lädupi
aśhta inti jiꞌalpunancama tantiapäcunꞌa
yaꞌapïta juc dios mana caśhanta.
Yaꞌallamari Tayta Dios cayá;
manamá juc canchu.
7 Yaꞌami acchïta,
tutäta luläca cayá;
yaꞌami allin cawsayta,
mana allin cawsaycätapis licalichïca cayá.
Yaꞌa Tayta Diosllamá lluy imactapis lulaycüca cayá.
8 “Am sïlucuna,
quićhacaculꞌari tamyachimuy.
Am pucutaycuna,
chullupäculꞌari tincüninman
licaycuyta ćhächipämuy.
Am allpa,
quićhacuyꞌari salbasyuncäwan
tincüninman licaycuyca wiñamunanpä.
Yaꞌa Tayta Diosmari lulaycüca cayá.
9 “¡Imanuylä canꞌa luläninta cutipacücunaca!
¿Cutuśh wacuyca luläninta:
‘¿Ima-nilätatá lulayämanqui?’a
nil ninmanchun imamá?
Ütac:
‘¿Mana allintamá lulayämanqui’ ninmanchun imamá?
10 Imanuylä canman chayllala näsïshaca
taytanta:
‘¿Imapämi lulamälanqui?’
niptin.
Ütac mamanta:
‘¿Imapämi waćhamälanqui?’
niptin” nil.
11 Israelcunäta lulä Chuya Tayta Diosnin caynümari nin:
“¿Śhamü timpucunäćhu imanuy canantapis
niycunaclächun cayanꞌa imatá?
¿Chulïcunapi willaycunaclächun cayanꞌa imatá?
¿Imanuypa lulaśhäcunactapis niycunaclächun cayanꞌa imatá?
12 Cay pachäta yaꞌami lulalá;
nunätapis yaꞌamari lulaycul chayman ćhulayculá.
Sïlütapis yaꞌami maquïwan maśhtayculá;
chayćhu uyllurcunaca caycunanpäpis yaꞌami niyculá.
13 Mandacü Ciro tincüllanman lulaycunanpä yaꞌami śhalcachishä;
pulinancunactapis pampataycuśhämi.
Paymi malcäta caśhan śhalcachinꞌa;
imallactapis mana pägayculmá
prïsu puśhaśha cäcunätapis libraycamunꞌa.
Caynu cananpä sumä munayniyu yaꞌa Tayta Diosmi ní” nil.
14 Tayta Diosmi nin:
“Egipto nasyunpa lulaynincuna,
Etiopia nasyunpa cänincuna,
Saba malcayu
jatun-cama nunacunäpis maquiquićhüñam canꞌa.
Ipayquitam cadinäśha-cama lipäcunꞌa;
ñawpäniquićhu unꞌulacuyculmi mañacuśhunqui:
‘Tayta Diosmi amwan cayan;
paypïta juc manamá canchu’ ” nil.
15 Rasunpa,
amꞌa mana licana Tayta Diosmi canqui;
Israelpa salbaycünin Tayta Diosmá canqui.
16 Taytachacunacta lluy luläcunaca pinꞌayćhu
uyshulächisham capäcunꞌa.b
17 Israelcunätañatacmi ichá Tayta Dios wiña-wiñaypä salbaycunꞌa.
Paycuna manañamá imaypis uyshulächishachu canꞌa
nï pinꞌayćhüpis capäcunꞌañachu.
18 Awari,
sïlüta lulä Tayta Diosmi
cay allpätapis lulalcul tacyaycachila.
Manam yanꞌalpächu lulala,
sinuꞌa nunacunaca chayćhu yaćhananpämi.
Chayćhu yaćhananpä unanchäcämi nin:
“Yaꞌallam Tayta Dios cá;
manamá juc canchu.
19 Yaꞌa pacallapachu manam limalá,
nï tutapä pacaläcunaćhüchu nilá.
Jacobpa milaynincunacta manamá nilächu:
‘Mana imapis caśhancäćhu ashipämay’ nil.
Yaꞌa Tayta Diosꞌa tincüllanman cäcätamá niycú;
rasuncällactamá limaycú.
20 “Lluy nasyuncunapi ayïcunaca juntunacaycälil aśhuycapämuy.
Cullupïta cä taytachacunacta śhalcalcachil
apaycaćhäcunaca mana tantiayniyücunamá;
mana salbayta atipäcunäman mañacücunaca luclucunamari.
21 Má,
rasun caśhanta juntunacaycälil tantiaycälichimayꞌari.
¿Caycunacta mayanmá
una-unay timpucunapïtalä willacula?
¿Manachun yaꞌa Tayta Dios caycunapi willaculá imamá?
Yaꞌapïta juc dios manamá canchu.
Tincüllanman lulaycü,
salbaycü
yaꞌa Tayta Diosnuꞌa juc manamari canchu.
22 “Jinantin allpäćhu cäcuna yaꞌaman cuticalcämuy salbaycälinacpä.
Yaꞌallamari Tayta Dios cá;
manamá juc canchu.
23 Quiquïpa śhutïćhümi limalicú;
rasuncällacta lulaycunäpä
limalicuśhäta tincüllanman lulaycuśhämá:
‘Ñawpänïmanmi lluy nunacunaca unꞌulaycälimunꞌa;
lluymá masïsu chalapacamänanpä limaliculcanꞌa’ nil.c
24 “Paycunam yaꞌapi nipäcun:
‘Tayta Diosllaćhümi tincüninman
licaycuycäwan sumä sigüru cayca cayan’ nil.
Paypa cuntran śhalcücunaca ñawpäninman
śhapämulmi uyshulächisha capäcunꞌa.
25 Israelpa milaynincuna Tayta Dioswanmi allinpä licaycuśha,
altuman juluycuśha capäcunꞌa” nil.