Tayta Dios jucllayllamá
44
“Canan má,
sirbïní Jacob uyalimay;
aclacuśhá Israel uyalimay.
2 Mamayquip patanpi lulaśhüniqui,
yanapäśhüniqui Tayta Diosmi nin:
Sirbïní Jacob ama manchacuychu;
aclacuśhá Jesurunab ama manchacuychu.
3 Pasaypi chunyäcäman yaꞌami yacucta ćhächimuśhä;
chaqui allpäman yaꞌami mayucta licalïchimuśhä.
Milayniquicunamanmi Ispiritüta caćhaycamuśhä;
chuliquicuna allin caycälinanpämi niycuśhä.
4 Chayćha chächupäśha cä ulacunänu ćhawpinćhu wiñamunꞌa;
mayu patanćhu sauce nishan lantanu capäcunꞌa.c
5 Jucninmi ninꞌa:
‘Tayta Diospam yaꞌa cayá’ nil.
Jucninñatacmi:
‘Jacobpa milayninmi cayá’ ninꞌa.
Juccunäñatacmi maquincunaćhu isquirbipäcunꞌa:
‘Tayta Diospam yaꞌa cayá’ nïta.
Jinaman ‘Israelpa milayninmi cayá’ nïtalä ćhulaycunꞌapis” nil.
6 Sumä munayniyu Tayta Diosmi,
Israelta libraycü mandacücämi nin:
“Yaꞌami allaycuycäpis camacaycäpis cayá.d
Yaꞌapïta juc dios manamá canchu.
7 Má,
niycamächunꞌari,
¿mayanmá yaꞌanu canman?
Má,
niycamächunꞌari,
¿mayanmá allaycuycäpi
śhamü timpućhu ima pasanantapis niycula?
8 Ñatac amari manchaculcaychu nï chucchupäcuypischu.
¿Manachun una-unaypïtaña caycuna pasananpä nipäculac,
willayculac imamá?
Amcunamari tistïgú cayalcanqui.
Yaꞌapïta ¿juc dios cayanchun imatá?
Manamari.
Wancanu juc pacaycü manamá canchu;
jucta manamá lisïchu” nil.
Taytachacta alawayca luclu caymari
9 Taytachacunacta luläcunacae pasaypi luclucunamá.
Chay sumä ćhaniyüwan lulaśhancunaca manamá imapäpis bälinchu.
Taytachacunacta alawäcunaca pasaypi aplacuna luclucunamá.
Chaymi pinꞌayćhu capäcunꞌa.
10 Imapäpis mana bälï taytachacta
juc luclullamá lulaycunman.
11 Chayman lluy chalapacücunaca pinꞌayćhümá capäcunꞌa.
Chayta luläcunaca wañucü nunacunallamari cayalcan.
Cäraycuyman lluy juntunacälälilpis
uyshulächisham sumä manchäśha capäcunꞌa.
12 Má,
jïrru tacäca caynümi lulan:
ninäćhu caldaycachil martilluwan llapan callpanwan
tacaśhtinmari taytachacta lulan.
Luläca imactapis mana miculꞌa mana callpayümá;
yacucta mana upyalꞌa illacyanmá.
13 Cullucunapi luläcunäpis tupucunwanmi lluy tupun,
läpiswanmi unanchan,
cipilluwanmi llampuchan,
furmunwanmi dibujan;
chaynu lulalmi nunactanülla lulaycun.
Tuquish nunallactanu lulalculmi alawana wasiman śhaycaycachin.
14 Cayta lulananpämari munticunäćhu wiñä cedrocta,
cipresta,
encina ilucta cuchula;
pino lantaśhancätapis tamyälämi wiñachimun.
15 Chaycunapïmi waquincunawanꞌa
nunacunaca unupaculcänanpä cañapäcun;
waquinwanꞌa urnuctam caldachipäcun tantacta lulapäcunanpä.
Chay partin iluwanñatacmi taytachactapis lulaycälil
puntanman unꞌulacaycälil alawapäcun.
Juc taytachacta lulacuyculmari puntanman unꞌulacaycälinlä canpis.
16 Waquin iluctañatacmi śhanśhay-śhanyayta lupaycachil
aychacta cancapäcun;
chaytamá maćhaycunancama micucuycun.
Chaypïta unupacuyculmi:
“¡Cay lulapäcuśhanta licapayal unulïlüñamá!”
nin.
17 Quïdä ilupïtañatacmi taytachanta lulan;
chaynu lulayculmi puntanman unꞌulacuycul alawapäcun.
Mañacunlämi canpis:
“Am taytachämi canqui;
salbaycälimayꞌari” nil.
18 Chay nunaca pasaypi manamari imactapis yaćhanchu nï tantianchu.
Ñawincuna wićhacäśha cayalmi mana licapäcunchu.
Śhunꞌunpis wićhacäśha cayalmi mana tantiapäcunchu.
19 Chay luläca mana yaćhayniyu,
mana tantiaculmi caynüllapis nï ninchu:
“Cayꞌa,
partin ilullamari.
Waquintá unupaculcänäpämari lupälälichí;
śhanśhanćhüñatacmi tantacta lulaycul,
aychacta cancaycul micacälälí.
Partin quïdä ilullawan ¿imanuypamá millachicuy taytachacta lulayäman?
¿Chay ilullapi luläśhap puntanmanchun uyshuycuyäman imatá?”
nil.
20 Chay lulaśhanca ućhpacta micuyänu mana tantiayniyümá.
Śhunꞌun munaśhancäwan apachiculmi
imallaćhüpis mana yanapäcäman chalapacun.
Chaynu cayalpis manamá ninchu:
“Cay allï maquïćhu uywaśhá taytachaca,
¿manachun yanꞌal-yanꞌal imamá?”
nil.
Israeltam Tayta Dios salbaycun
21 Jacob,
caycunacta yalpay.
Am Israel,
sirbïnïmá canqui.
Yaꞌami lulaycüniqui cayá.
Yaꞌa manamá unꞌaśhayquichu.
22 Cuntrá mana allin lulaśhayquicunacta pucutaycätanümá chincächí;
juchayquicunacta śhullictanümá chincächí.
Yaꞌaman cuticamuy;
yaꞌami libraycüniqui cá.
23 Cayta Tayta Dios lulaycuśhanpi sïlucuna taquipäcuy.
Luli-luli allpacuna cushicuypi sumä callpawan nipäcuy.
Lluy ulꞌucuna munticunäćhu cä lantacunäwan cusca alawapäcuy.
Awari,
Tayta Diosmi Jacobta libraycun;
Israelćhümari sumä cayninta camalaycachin.
24 Mamayquip patanpi licalichishuśhayqui,
libraycüniqui Tayta Diosmi nin:
“Yaꞌa Tayta Diosmi lluy imactapis luläca cayá.
Mayanpapis mana yanapaycuśhamá sïlütapis
yaꞌa maśhtayculá,
allpätapis tacyaycachilá.
25 Artish willacücunaca willaculcäśhanta
yaꞌami mana caśhanman ćhulaycú.
Licacü rüjacunätapis pinꞌaymanmi ćhulaycú.
Yaćhäcunätapis pantaycachí luclu caśhanta tantiaculcänanpämari.f
26 Willacünïpa willacuśhantañatacmi ichá nishantanülla yaꞌa lulaycú;
caćhaśhäcunapa limanacuśhancunaca lulacacunanpämi lulaycachí.
Paycunawanmi Jerusalenta willaycachí:
‘Cay Jerusalenćhu nunacuna caśhanmi yaćhapäcunꞌa’ nil.
Judatañatacmi willaycachí:
‘Am Judapa malcancuna,
caśhan śhalcachisham canqui;
pampaman muyüchisha pilayquicunactamá caśhan yaꞌa śhalcachishä’ nil.
27 Yaꞌa niptïmari lamarcäpis lluy chaquïlunꞌa;
mayu lïcunäpis manaña canꞌachu.
28 Yaꞌamari mandacü Cirocta ní:
‘Anmi michïní canqui.
Lluy munaśhäta anmari lulaycunqui’ nil.g
Chaymi pay ninꞌa:
‘Jerusalenta caśhan śhalcachipäcuy.
Tayta Diospa alawana wasinpa simintunta
caśhan ćhulapäcuy’ ” nil.