Jerusalen imanuypis cananpämi nin
22
Jerusalenpa lädunćhu cä Licachina Pampa nishanca imanuypis cananpämi caynu niman:
Jerusalenćhu,
¿imamá pasacuyan?
¿Imapïmá cushiculcänanpä altuśhcunäman lluy-lluy ishpicuyalcan?
2 Jinantin malcantinmá sumä-sumä lüyayllaćhu cacuyalcan.
Cushicuyllaćhu cä malcaćhu ¿imactatá licayá?
Mayćhüñapis wañüśhallactañamari licayá.
Wañüniquicuna manamari pilyaćhüchu wañula
nï ispädawanchu wañupäcula.
3 Lluy puydïniquicunamá
flïchacunäpïta mana-mana ayicuyalcan.
Chaynu caluctaña ayiyalcalptinpis
ćhïnicünincuna lluymá chalälälin.
4 Chaymi nilá:
“Japalläta caćhaycamay;
mana callpá canancama waꞌacuśhä.
Malcá camacaycüśha caśhanpïta
ama cunsuylayta ćhapapämaychu” nil.
5 Sumä munayniyu Tayta Diosmi manchanaśh,
llaqui,
pantächisha muyun Licachina Pampapä caśhanta nimäla.
Jerusalenpa murällancunacta
pampaman muyüchiptinmari ulꞌucunäpis
yaćhapänancama ayaycaćhapäcunꞌa.
6 Elam nunacunämari flïchancunacta apanapä cayäcäta
apacälälisha,
carritancunaman ishpïlälisha,
cawalluncunaman sillacalälisha cacuyalcan.
Kir nunacunäñatacmi pilyaćhu atajachicuncunawan cacuyalcan.
7 Tuquish-cama pampayquicunamá gïrrapä
cä carritacunawan juntäśha cacuyan.
Cawalluman sillacälälisha cäcunäpis
malcap yaycunanćhüñamá cacuyalcan.
8 ¡Ima lulaytapis mana atipämi Juda licalïlun!
Chay muyunmi Munti Wasi nishanćhu
armacuna ćhulaläśhanman lipäcunqui.a
9 Chaynütacmi Jerusalenpab
aśhäśha murällancunactapis licapäcunqui.c
Lulićhu cä istanquimanpis yacucunactam winapäcunqui.d
10 Jerusalenćhu lluy wasicunäta tuquicta licaycälimuy;
waquincunacta tunilcul chaycunawan murällacta allichapäcuy.
11 Chay ishcaynin murällap ćhawpinćhümari istanquicta lulälälinqui;
chayta lulalanqui unay istanquipi yacu pasamüca ućhananpämi.
Ñatac manamá mayan lulaśhantapis tantiapäculanquichu
nïtac unaypïña lulaśha cananpä
Tayta Dios unanchaśhantapis yalpaćhaculcälanquichu.
12 Chay muyunćhümi sumä munayniyu Tayta Dios
nipäcuśhunqui mamay-taytayta waꞌaculcänayquipä,
jinaman llaquicuypi ächayquita lutuculcänayquipä,
shicacü müdanawan ćhulaculcänayquipäpis.
13 Amcunañatacmi ichá fistachacuyllaćhu,
tuśhucuyllaćhu,
wäcacunacta uwishcunacta wañuchiyllaćhu,
aychallacta micuyllaćhu,
bïnu upyacuyllaćhu capäculanqui:
“Upyacuśhun,
micucuśhun wala śhalun wañucüllam canchic” nil.e
14 Chaypïta sumä munayniyu Tayta Diosmi linlilläćhu caynu niman:
“Cay malcap juchan wañunancama manamá pampachaycuśhachu canꞌa.
Sumä munayniyu quiquin yaꞌa Tayta Diosmari niyá” nil.
Sebnap pudirninmi Eliaquim yaycun
15 Chaypi sumä munayniyu Tayta Diosmi caynu niman:
“Puydïcäpa wasinćhu imantapis licaycü Sebnaf nunaman lilcul caynu niycamuy:
16 “¿Am,
mayantucunquimá?
¿Altunninćhülä sumä sipultüracta lulacünayquipä pitá canqui?
¿Imapïtá altu wancaćhülä
jamanayquipä labracülunquipis?
17 Má,
Tayta Diosmari calu-caluman prïsu puśhachishunqui;
callpa callpawanmá wicapäśhunqui.
18 Culultanu calućhu cä chunyäman,
callpa-callpawan chapïshuptiquimá chayćhu wañumunqui.
Chayćhümá gïrrapä allin-cama
cärritayquicunapis quïdanꞌa.
¡Puydïniquip pinꞌayninmá canqui!”
nil.
19 Tayta Diosmi nin:
“Chay allin caśhayquipïta wicapäśhayquimá;
chay allin lulayniquipïta alapacüśhayquimá.
20 Jinalculmi Hilciaspa chulin Eliaquim sirbïnïta ayaycuśhä.
21 Paytam müdanayquiwan,
waćhacuyquiwan ćhulaycuśhä;
ampa pudirniqui mandacunanpä paytañamari ćhulaycuśhä.
Jinaptïmi juc taytanu Juda lädupä,
Jerusalenćhu yaćhäcunäpä caycunꞌa.
22 Davidpa Wasinpa quićhacuntapis paypa maquinmanmi yaꞌa ćhulaycuśhä.
Pay quićhaśhanta manamá mayanpis wićhayta atipanꞌachu;
pay wićhaśhanta manamá mayanpis quićhayta atipanꞌachu.g
23 Pilamanmi ishtacactanu tacyaycachishä;
paypamari taytanpa aylluncunapis mandacuyninćhu altuman juluycuśha canꞌa.
24 Paymari taytanpä,
chulincunapä,
willcancunapäh juc ishtacanüpis caycunꞌa;
paypam lluy aylluncuna altuman juluycuśha capäcunꞌa.
25 “Ñatac ishtaca allinninćhu caśhancäpi juluna timpu ćhämunꞌam.
Chayćhümi julüśha cal camacaycüśha canꞌa.
Lluy chalaläcäpis paywan cuscamari pampäman palpämunꞌa.
Sumä munayniyu yaꞌa Tayta Diosmari niyá” nil.