Apanacuśhancuna taquipäcuśhan
6
Lluy walmicunäpïtapis mas tuquish-tuquishnin walmi,
¿cuyacuśhayquica maytatá licun?
¿Cuyaśhüniqui mayninpamá licun?
Ashimü lishunꞌari.
Wamlaca
2 Cuyacuśhäcäní wirtamanmi jiꞌacuycun,
mishqui aśhnä waytacunämanmi pasacun,
wirtacunäćhu pulipacamümi licun,
liryucunäta pallämi pasacun.
3 Cuyaśhäní yaꞌapamá;
yaꞌapis paypamá cayá.
Paymá liryucunap ćhawpinćhu uwishninta michiycun.a
Picha taqui
Walaśh
4 Cuyacuśhäcäní sumä tuquish-tuquishllamá;
Tirsa malcänu tuqui-tuquimá,b
Jerusalennu munapaśhllamá;
pilyaman bandirancunawan sumä-cama lïcunänümá.
5 Amaña licapayämaychu;
ñawiquiwan suwämanquiñamá.
Galaad lädu wätacunäpa paćhcaycaćhaśhtin
jiꞌalpapämü capishcunänümá ächayqui cayan.
6 Chayllala almächisha yulä-cama
uwishcunanümá quiluyquicuna cayan.
Pärish-pärishniyümá cayalcan;
manamá jucllanpis chullallá canchu.c
7 Cärayquipis śhucupacuyniquip lulinćhu
ishcay granadillanu pucay-pucaychamá cayan.
8 Puydïcäpa süta ćhunca (60) tuquish walmincunamá;
uywanacuśhan walmincunapis pusä ćhuncamá (80),
wamlancunañatacmi mana yupaycunalä cayanpis.
9 Tuquish ulpaychänïñatacmi ichá jucllaylla,
sumä-sumächa,
mamanpa ama-pacha nishanca,
ishyacuśhan mamanpa sumä cuyaśhanca.
Payta licapäculmi allin cananpä wamlacunäpis niycälin;
puydïcäpa walmincunawan uywanacuśhan
walmincunapis payta alawaycälinmá.
Apanacuśhancuna taquipäcuśhan
10 ¿Mayantá chay walmica achicyäluptin
inti sumä yalamücänülä cayäca?
Tuquish-tuquish quillänu,
chipipicyayä intïnu,
pilyaman bandirancunawan sumä-cama lïcunänülämari cayanpis.
Wamlaca
11 Nugal lantancuna caśhancämanmi pasacú,
pampacunäćhu lluy waytacunäta licaycamü,
üba lantacunaca chillquimuśhanta licaycamü,
granadillacuna waytamuśhanta licaycamü.
12 Manalä tantiacuptïmi aychäpa
munaynin puydïnïpa carritanman ćhächimäña.
Apanacuśhancuna taquipäcuśhan
13 ¡Sulam lädu tuquish wamla,
cuticamuy,
cuticamuy!
¡Licanacpä cuticamuy,
cuticamuy!
Wamlaca
Sulam lädu wamlaćhu,
¿imactamá licayta munapäcunqui?
Apanacuśhancuna taquipäcuśhan
¿Imapïmá lluy jamapäcuśhanpa puntanćhu tuśhunanta munapäcunqui?