Walaśh
5
Cuyacuśhá walmïní,
wirtäman yaycülüñamá.
Chayćhümi mïrractawan balsamucta pallaycú;
chayćhümi mishquiwan maćhacuycú;
chayćhümi bïnuctawan lichictapis upyacuycú.
Apanacuśhancuna taquipäcuśhan
Cuyaśhá lisinacuśhäcuna,
micuculcay;
munaśhayquicama upyaculcay.
Tawa taqui
Wamlaca
2 Yaꞌa puñuyaptïpis śhunꞌüñatacmi ichá licchat-licchat cayäla.
Chayćhümi cuyaśhá wayapäní ayamuśhanta uyalïlú:
“Puncuyquita quićhaycallämay,
cuyacuśhäní,
sumä ulpaychäní,
tuqui-tuqui walmillay.
Umäpis śhulliwan puśhtäśhamá cayällan;
ächäpapis śhullillamá śhutuyämun” nïta.
3 Yaꞌañatacmi nilá:
“Müdanäta uśhticülüñamá,
¿caśhanchun müdacuśha imamá?
Ćhaquïtapis paꞌacülüñamá,
¿caśhanchun anlacuśha imamá?”
nil.
4 Cuyaśhá wayapänïñatacmi quićhananpä puncup ućhcullanpa maquinta chacchaycämun.
Jinaptinmi paypïta śhunꞌulläpis tic-ticyäcuyan.
5 Cuyaśhäcänïta quićhanäpämi śhalcülú,
maquïpapis pirfümim śhutuyäla,
dïdücunapapis
mishqui mïrram puncup wićhacunmanpis śhutuyäla.
6 Cuyaśhäcänïta quićhaycuptí manañamá cañächu;
licuñäñamá.
Chaymi śhunꞌüpis manaña śhunꞌuchu cala.
Ashilpis manañamá talilächu;
ayaptïpis manañamá uyalimälachu.
7 Malcacta täpäcunaca tutanpa muyuyalcalmá talïlälimäla;
murällacta täpäcunaca maꞌälälimälam,
supaynïtam apälälïchimäla,
müdanätapis quitälälimälam.
8 Jerusalen walmicuna,
ama chaynu capäcullaychu,
cuyaśhäcänïta talïlälilꞌa yaćhaycälichipallämay:
“Ampïta llaquiculmi ishyayällan” nil.
Apanacuśhancuna taquipäcuśhan
9 Juccunapïtapis mas tuquish-tuquishnin walmi,
¿imaćhütá juc wayapacunapïta mas allin chay cuyacuśhayquica?
¿Imaćhütá cuyacuśhayquica juc wayapacunapïta
mas allin chaynüpaña nipayämänayquipä?
Wamlaca
10 Cuyacuśhäcäní tuqui pucay-pucaycham;
ćhunca walanga (10,000) wayapacunapïpis mas lisipaśhllamá capaman.
11 Umanpis sumä ürunümi chipyayan;
cushpa ächanpis wisculpanümá yana-yanacha.
12 Ñawincunapis pucyucunap patanćhu ulpaychacunänümi achipipicyayalcan;
lichiwan almächishanümi istanquip patanćhu sumä cayalcan.
13 Cärancuna wirtaćhu tuqui aśhnä
waytacunänümi tuquilla aśhnayalcan;
shiminpis mïrrawan pirfümïśha liryucunänümá cayäpalläman.
14 Maquincunapis üru surtijap ñawinman aläjacuna ćhuläśhannümá cayällan.
Lluy aychanpis marfil zafiro sumä lumicunawan adurnäśhamá cayäpalläman.
15 Caćhpancunapis ürunllanllanwan
simintäśha marmul paradïrucunänümá cayällan.
Libanopïta cä cedro ilucunänümá
sumä caynin cayäpalläman.
16 Limacuyninpis mishqui-mishquimá;
payꞌa maypis cuyapaśhllamá.
Jerusalen wamlacuna,
chaynümá cuyaśhäcäní,
chaynümá lisinacuśhäcäní.