Sumä-sumä tuquish-tuquischallamá canqui;

śhucupacuśhayqui lulinćhu ñawiquicuna

ishcay ulpaychanümá cayalcan.

Ächayqui Galaad ulꞌüćhu capish paćhcaycaćhäcänümá cayan.

2 Chayllala lutüśha,

almächisha yulä-cama

uwishcunanümá quiluyquicunapis cayan.

Pärish-pärishniyümá cayalcan;

manamá jucllanpis chullallá canchu.^a

3 Shimiquipis puca puchcanümá pucay-pucaychalla cayan.

Limayniquipis maypis aticunamá,

cärayquicunapis śhucupacuyniquipa

lulinćhu ishcay granadillanu tuqui pucay-pucaychamá cayan.

4 Cuncayquipis Davidpa türrinnu

tuqui-tuquillamá,

walanganpi alli-cama pilyänincunap

atajachicuncuna walcalapäcuśhan türrinnümá cayan.

5 Ñuñuyquicunapis awacha luychunümá,^b

liryucunap ćhawpinćhu lancalayalcan.

6 Muyunca manaläpis achicyalcuśhancama,

intica manaläpis ishpimuśhancamam mïrra pirfümi caśhan ulꞌuman,

insinsiu caśhan ulꞌunpalcücäman yaꞌa lilläśhä.

7 ¡Am cuyacuśhäcäní,

tuquish-tuquishllamá canqui!

Amćhuꞌa manamá ima mana allinllapis caycunchu.

8 Walmichallay,

Libano ulꞌupïta lilläśhun;

Libano ulꞌupïta jiꞌalpulläśhun.

Amana nishan ulꞌup puntanpïta lilläśhun;

Senir,

Hermon ulꞌup puntanpïta jiꞌalpulläśhun.

Liyuncunap maćhayninpïta lilläśhun;

tigricuna yaćhaśhancäpïta jiꞌalpulläśhun.

9 Cuyacuśhá walmillay,

śhunꞌullätam suwaycämanqui;

licalcuyllayquiwanmi cuncayquićhu jucllay tuquish

cullarllayquiwan śhunꞌulläta suwaycämanqui.

10 Cuyacuśhá walmillay,

sumä-sumämá cuyacuyniqui.

Bïnucunäpïpis mas-maslämá cuyacuyniqui;

lluy-lluy tuqui mishqui aśhnaycunäpïpis

mas-maslämá pirfümiqui.

11 Am cuyaśhá walmïnïpa,

shimiqui urunwaypa mishquinnülämá;

muchacuyniquipis lichiwan mishquinülämá.

Libanoćhu cä cidru ilucunäpa aśhnayninnülämari

müdanayquicunapis pirfümïsha cayan.

12 Am cuyacuśhá walmïní,

murälläśha wirtämá caycunqui;

japächäśha pucyümi;

pacäśha yacümá caycunqui.

13 Am canqui mishqui-mishqui

wayuyniyu granadilla wirtamá;

alheña wayta,

nardo wayta wiñanan wirtamá am caycunqui.

14 Jinaman nardo,

azafran wayta,

tuqui aśhnä cäña,

canïla,

insinsiu jaćhacuna,

mïrracuna,

aloe jaćhacuna,

mishqui aśhnä jaćhacunapis

caśhannu wirtamá am caycunqui.

15 Wirtaćhu pucyumá am caycunqui;

Libano ulꞌupïta tuqui-tuqui

yacu yalamücämi am caycunqui.

sur lädu waywa jucllaña śhamuy,

wirtäman pücapämul jinantin läduman tuqui mishqui aśhnaycäta chiꞌichipäcunayquipä.

Am cuyacuśhá wayapäní,

wirtayquiman śhacamuyñari.

Mishqui-mishqui wayuyninta micucuycuyñari.