2 Tayta Diospa ñawpäninćhu limalicuyalꞌa mandacücäpa nishanta lulaycunayquimá.

3 Lulanayquipä cäcäpi ama ayiyaychu,

nïtac mana allin luläcunäwan jucllachacuyaychu.

Mandacüca ima munaśhantapis lulälunmanmá.

4 Mandacücäpa ima nishanpis pudirninman atinïdumá.

Mayanpis manamá “¿imapämi lulayanqui?”

niycunmanchu.

5 Nishanta lulaycüca manamá mućhuycachishachu canꞌa.

Yaćhayniyüca imay imanuypa allincäta lulaycuytapis yaćhanmá.

6 Lluy ima munaśhanchiccäpäpis timpu cayanmi;

imacta,

imanuypa lulanapäpis timpu cayanmá.

Ñatac nunaca jatun ñacayninta,

7 imacuna pasananta,

imay pasanantapis manamá yaćhacunchu.

¿Mayanmá chaycunacta payman willaycunman?

8 Cawsayninta manamá mayanpis lantilachu;

wañuycäta manamá pipis atajaycunmanchu.

Gïrraćhu cayal manamá ayinmanchu;

juchasapa nunäpis manamá wañuycäpi ayinmanchu.

9 Cay allpäćhu lluy imacunactapis tuquicta sumäta tantiapayculmi licayculá,

nunaca juccunacta ñacachil quiquinpä mana allinninpä caśhanta.

10 Chaynütacmi licalá juchasapa nunacunäta alawaycälil pampaycälishanta.

Allincämannu cawsaycü allin lulaycücätañatacmi ichá malcanćhüpis nï yalpalcälinpischu;

chaypis yanꞌal-yanꞌalmá.

11 Mana allin lulaśhanpi juclla mana mućhuycachiptinꞌa mana allin lulaytamá nunacunaca mishquillacälälinꞌa.

12 Ñatac juyu nunaca paćhac (100) cuti juchapacuyal achca wata allin cawsaynin cayaptinpis,

Tayta Diosta manchacuywan cäsucücunaca mas allin caycälinantamari yaćhá.

13 Mana allin luläcunaca Tayta Diosta mana manchaculcäśhanpïmá imaćhüpis mana allinlla yaluycunꞌa;

llantuynüllamá cawsayninpis pasacunꞌa.

14 Cay allpäćhu mana tantiayta atipanamá pasaycun;

allin nunaca juyu nunacunänümá ñacaycunacta pasaycun.

Mana allin nunätañatacmi ichá allin nunacunänülä allinlla cawsaycälin;^a

caypis yanꞌal-yanꞌalmá.

15 Chaymari cushicuycäman yaꞌa śhalcuycú.

Mas allin cay allpäćhu nunaca micucunan,

upyacunan,

cushicunanmari.

Chayllactamá apacunꞌa Tayta Dios cawsayta uśhan muyuncunaćhu lluy lulaynincunapi.

16 Yaćhaycäta ashishäćhu jinaman cay allpäćhu nunacunaca lulaśhanta licaycuśhäćhu tutanpapis,

muyunpapis manamá imchiyculächu.

17 Chaynüpam tantiaycú cay allpäćhu Tayta Dios lluy lulaycuśhancunacta nunaca tantiayta mana atipäśhanta.

Masqui sumä-sumä imanaculpis manamá talinchu;

masqui sumä yaćhayniyüca “lisiyämi” niyalpis manamá taliyta atipanchu.