Imapïpis mas sumä allin cäca
7
Sumä mishqui aśhnä pirfümipïtapis mas allin sumä lisisha caymá.a
Näsishan muyunpïtá mas allin wañucuśhan muyuncämá.
2 Fistaman liypïtá mas allin pampacuyman liymá.
Lluy nunapis wañuycämanmari liyalcan;
chaymi cawsäcunaca chayta tantiapäcunan.
3 Asiypïtá mas allin waꞌacuymi;
llaquicuycäwan cäran jucmanyaptinpis śhunꞌunpäñatacmi ichá allin.
4 Yaćhayniyüca wañuycämanmi pinsaycun;
luclüñatacmi ichá cushicuyllaman pinsayan.
5 Luclucunäpa alawaycuyninta uyaliycuypïtá
yaćhayniyücunäpa anyapayninta uyaliycuymi mas allin.
6 Caśhacunaca ninaćhu lapaćhaćhyaśhannümá
luclüpa asicuynin juclla pasacun;
chaypis yanꞌal-yanꞌalmá.
7 Ñacachïca luclumanmi yaćhayniyücäta muyuchin;
śhalcuyninwan yanꞌalpi uycuyca śhunꞌuctamari pirdichin.
8 Lulayta allaycuypïtá mas allin lulayta camacaycuymi;
nunatucüśha caypïtá mas allin pasinsiayniyu caymi.
9 Piñacuyniquiwan ama apachicuyaychu;b
piñacuyca luclucunäpa lulayninmá.
10 Ama niyaychu:
“Ay,
punta timpucuna mas allinmi cala” nil;
chay manamá yaćhayniyüpa limayninchu.
11 Cay allpäćhu yaćhayniyu cay allinmi;
mas allinlämi cäniyu cayal yaćhayniyu cayca.
12 Yaćhaycäwan,
illaycäwanꞌa imactapis lulaycunquimanmi;
ñatac yaćhaycällamá cawsaycachishunquiman.
13 Tayta Dios lulaycuśhanta tuquictari licaycuy;
pay wicsuchishanta ¿mayanmá dirichaycunman?
14 Allin lluy caycuptinꞌa cushishari cawsaycuy;
mana allin ćhämuśhuptiquiꞌa tantiacuycuyꞌari.
Pulantapis Tayta Diosmi unanchaycula
lluy nunacuna śhamü timpucunäćhu
imacuna pasanantapis mana yaćhananpä.
15 Cay yanꞌal cä cawsaynïćhüñatacmi licalá:
Allin nuna nisha müsucuna allin cayalcalpis wañuśhanta;
mana allin nunacunäñatac juyu cayalpis
achca watacuna cawsaycälishanta.
16 Ama allintucuychu nï yaćhätucuychu.
¿Imapämá quiquillayqui mana caśhanman muyuchicuyanquiman?
17 Amatac ancha juyu-juyutucuychu,
nï anchap luclutucuychu.
¿Imapïmá manalä timpuyquićhu wañunquiman?
18 Chay nishancunaman tantiaycuy allinmá.
Tayta Diosta manchacü nunäpá
ima lulaśhanpis allinmá yaluycun.
19 Ćhunca malcacunap puydïnincunapïtapis
mas munayniyütalamá yaćhayca
jucllay yaćhayniyu nunallactapis caycachin.
20 Cay allpäćhu manamá mayanllapis canchu
mana juchacü,
allincällacta lulaycü allin nuna.c
21 Lluy ima nishancunactapis ama uyaliyaychu,
mana allinniquita nunayqui limaśhuptiquipis mana uyalinayquipä.
22 Am,
tuquictamari yaćhanqui nuna-masiquip
mana allinninta achca cuti limaśhayquita.
Yaćhayniyu caytam ashiycun
23 Yaćhayniyu cayta munaynïwanmi imaymanap tantiayculá:
“Yaćhayniyümi caśhä” nil.
Ñatac yaćhayca yaꞌapïta ayicunmi.
24 Tantiayca calu-calućhümá cacuyan;
sasa-sasa talinaćhümá cayan.
¿Mayanmá taliycunman?
25 Chaymi yaćhayca imanuy caśhantapis tantiaycunäpä tuqui-tuquicta aśhpipayculá.
Chaynüpamari tantiayculá juyu cayca,
luclu cayca mana allin caśhanta.
26 Chaynütacmi quiquinta munachicü walmica wañuycäpïpis mas ćhacćhä caśhanta taliyculá;
śhunꞌunpis tullmänümá,
challwa chalacunümá,
maquincunapis cadinanümá.
Chaynu walmipïtá Tayta Dios munaśhannu cawsäcämari ayinꞌa;
juchasapäñatacmi ichá chayman palpunꞌa.d
27 Yaꞌa yaćhachicücämi lluy imapis imanuy caśhanta sumäta tantiaycul cayta yaćhayculá:
28 Maynu-maynu tantiaycuyalpis ashishäcäta manalämá talïchu.
Walanga (1,000) umricunapïtam jucllacta allinta taliycú;
walmicunäćhüñatacmi ichá jucllayllactapis nï talïchu.
29 Chaynu captinpis caytamá taliycú:
Nunäta mana juchayütam Tayta Dios lulaycula;e
nunacunäñatacmi ichá imaymana mana allinninta ashicülun.