6
Cay allpäćhu nunacunäta juc sumä mana allin pasaśhantamá licälú.
2 Waquincunacta Tayta Diosmi ima cänincunacta altuman juluycuśha cananpäpis uycun;
ima munaśhanpis manamá pishiycunchu.
Chaycunawan cushicunanta Tayta Dios mana munaptinñatacmi aśhta mana lisisha nunacunäña chaycunawan cushiculcan.
Chaypis yanꞌal-yanꞌalmá;
sumä llaquimá.a
3 Masqui paćhac (100) chulin captinpis,
achca wata cawsaptinpis,
ima capuśhanpïpis mana cushicuptinꞌa,
jinaman allinpä pampaycuśha mana captinꞌa śhullüśha nunapis paypïtá mas allinlämá cayan.
4 Chay śhullüśha nunaca yanꞌalñamá śhamulapis;
tutawyaycäman cutinallanpäñamá.
Mana lisishamá śhutinpis tutayaycäćhu cayan.
5 Acchictapis manamá licalachu,
nï lisilapischu.
Chaynu cayalpis chay nunapïtá mas jawcamá jamacun.
6 Masqui ishcay walanga (2,000) wata cawsalpis allincäwan mana maćhaycuptinꞌa ¿ima allinmá?
¿¡Manachun chayllaman lluypis liyalcan imatá!?
7 Nunaca patanpämá lulay-lulay cayan;
manatacmá imaypis maćhaycälinchu.
8 Chayurá ¿yaćhayniyu nunaca imaćhümá mas allin luclu nunäpïtá?
¿Imactamá julucun waccha nunaca allin cawsaycuśhanpïtá?
9 Mana cayaptin munapäśhallanchicpïtá mas allin maquinchicćhu caśhancäñamá.
Caypis yanꞌal-yanꞌalmá;
waywäta chalay munaśhanchicnüllamari.
10 Nunaca imanuy cananpäpis unaypïñamá camachisha,
unanchaśha cala.
Chayurá imanuy cananpäpis sumä pudirniyu Tayta Dioswanꞌa nunaca manañamá piñanacunmanñachu.
11 Mas-masta limalꞌa mana cätañamá liman.
Chaycunawan ¿imactamá nunaca julucun?
12 Cay ashllay timpu cawsaycäćhu ¿imanuy allin cawsaycuy caśhanta mayanllá lisiycuntan?
Cawsayca llantuynu yanꞌal-yanꞌalmá.b
¿Mayanllá yaćhaycuntan nunaca wañucuptin cay allpäćhu ima pasanantapis?