Tayta Diosman limaliculꞌa tuquictam tantiacunan
5
Tayta Diospa wasinman lilꞌa shimiquita wićhaycul uyalicunayquipä linliquita quićhaycuy.
Luclu nunaca Tayta Diosman uycuśhancänuꞌa ama lulaychu;
paycuna mana tantialmá mana allinta lulapäcun.
2 Amari mana tantiacul limäluychu,
nï śhunꞌuyquićhüpis juclla limalicüluychu;
Tayta Diosꞌa janay pachäćhümari cayan;
amñatacmi ichá cay allpällaćhu cayanqui.
Chayurá limayniqui ashlla caycuchun.
3 Imapïpis ancha-anchap wañupacücá muspapacunmi;
ancha-anchap limäcá luclunüñam liman.a
4 Tayta Diosman limalicülulꞌa jucllaña lulaycuy;
luclucunaca manamá Tayta Diospa śhunꞌunpänüchu.
Limalicuśhayquita lulaycuy.b
5 Limaliculcul mana lulaśhanchicpïtá mas allin mana limalicuymi.
6 Shimiquiwan amari juchacuyaychu nïtac Tayta Dios caćhaśhancäpa puntanćhüpis “mana tantiayculmi nilá” niyaychu.
¿Imapïmá chaynu nishayquiwan Tayta Diosta sumä piñayächinquiman,
jinaman lluy lulaśhayquitapis yanꞌal pampaman muyuyächinquiman?
7 Limayca manamá sasachu,
lichcayal suyñuśhanchicnüllamá,
yanꞌal mana allincunänüllamá.
Amñatacmi ichá Tayta Diosta manchacuywan uyalicunayqui.
Ima cäniyu caypis yanꞌal-yanꞌalmá
8 May malcaćhüpis wacchacunäta juc puydï ñacachishanta licalꞌa ütac tincüninman-cama mana licaycuśhanta licalꞌa ama äśhalayllaman camaychu.
Puydïcäta juc mas puydïninmi licapayan;
paytapis juc mas-mas puydïninlämi licapayantac.
9 Lluy nunapämi ćhaclacunäćhu talpuycunaca cayan;
ćhaclacunaćhu talpücunäpa allinninpämari mandacücäpis cayan.
10 Illaycäta cuyäcá mastalämá munacuyan;
ima cänincunactapis cuyäcá manamá jawcayaycunchu.
Chaypis yanꞌal-yanꞌalmá.
11 Mas cäniyüña captinꞌa masñatacmá gastawshïnincunapis.
Chaynu lluy chalaśhancunactapis licaycuylla licaycuyaptinꞌa ¿imapäñamá maynu cänincunapis bälinꞌa?
12 Lulapacü nunaca ashllacta miculpis ütac achcacta miculpis jawcamá puñucun.
Alli cäniyücätañatacmi ichá ima cänincunapis jawcactachu nï puñuchin.
13 Cay allpäćhu juc sumä mana allintam licalá.
Ima cänintapis tawacuśhanca quiquin nunanpa mana allinninpämá.
14 Cänincunacta mana allin nigusyuman ćhuläluptinꞌa pampamanmi muyülunman.
Jinaptinmi chulinpä manaña ima caćhaycunanpäpis canmanñachu.
15 Maynümi mamanpa patanpi calalla yalamula,
chaynümi mana imayu cuticunꞌa.
Wañuy-wañuy lulaśhanta mana apalmá licunꞌa.c
16 Caypis sumä mana allinmá:
śhamuśhallannu nunaca calalla cuticuśhanca.
Chayurá ¿imapäñamá ancha-anchap ñacaśhanpis bälin?
17 Jinaman cawsaśhancama walan-walanmá ñacayllaćhu,
ishyayllaćhu,
piñacuyllaćhu cawsayan.
18 Chaynu captinpis cay allincätamá tantiaycú:
Tayta Dios ashllay timpullacta uycamäśhanchic cawsaycäćhu mas allin lluy lulay-lulay caśhanchicpi cushicuśhanchicmi,
micucuśhanchicmi,
upyacuśhanchicmi.
Chaynu cawsanapämá unanchaycuśha cayanchic.
19 Chaynütacmi allin cayan Tayta Dios uycamäśhanchic cänincunap wayuyninpïta micunapä caśhanca;
chaywan imactapis lulal cushicunapä caśhanca.
Chaypis Tayta Dios uycamäśhanchicmá.
20 Chaynu nunäpa śhunꞌunman cushicuyta Tayta Dios juntaycachiptinmá cay cawsaycäpi mana wañupaculcanchu.