Cawsaycäćhu ñacaycuna
4
Chaynütacmi cay allpäćhu lluy ñacaycunactapis licayculá.
Ñacachisha cäcunäpa waꞌaynintamá licaycú;
manamá cunsuylaycunanpä mayanpis cañächu.
Ñacachïcunaca sumä pudirniyü-camamá caculcäña;
ñacäcunäñatacmi mana imanaytapis atipapäcuñächu.
2 Chaymi nilá:
“Wañücunaca cushishañamá cayalcan;
cawsäcunäñatacmi ichá ñacayćhu cayalcan.
3 Ñatac cawsäcäpïpis wañücäpïpis mas cushisha cayan manalä näsïcämá;
cay allpäćhu mana allin lulaycunäta manalämari licanchu” nil.
4 Chaynütacmi licalá lluy-yupay nunacunaca nuna-masinta imbidicul cäniyu cananpä anchap lulapäcuśhanta.
Chaypis yanꞌal-yanꞌalmá;
waywäta chalay munaśhanchicnümá.
5 Luclu nunaca maquintapis curuśhpacüśha cayalmi micuypi wañun.
6 Aśhwanpa allin jamaycuywan ashllactapis taliymi mas allin,
ancha-anchap ñacaywan achcacta taliypïtá.
Caypis waywacta chalay munaśhanchicnümá.
7 Chaynütacmi cay allpäćhu licalá juctapis yanꞌal-yanꞌal caśhanta.
8 Japallan umrimari,
mana chuliyu,
mana wawꞌi-caśhayu cayalpis sumä cäniyu cananpä wañuy-wañuy lulayan.
Manamá tapucunpischu:
“¿Imapätá cushicuytapis juc läduman ćhulaycul caynu-caynüpaña lulay-lulay cayá?”
nil.
Caypis yanꞌal-yanꞌalmá;
sumä ñacayllamá.
9 Jucllayllapïtá ishcay caymi mas allin;
pulanꞌa mastamá yanapänacunꞌapis allin cananpä.
10 Jucnin palpuptinpis juccämi śhalcachin.
Japallan cäcäpa maynu llaquimá;
palpuptin manamá śhalcachïnin mayanpis canchu.
11 Ishcay puñupäculpis unuchinaculcanmi;
japallanꞌa ¿imanuypamá unulinman?
12 Japallantá imapis llallïlunmanmi;
ishcayñatacmi ichá śhaycapaculcanman.
Quimsa cayalꞌa mas allinñamá;
quimsaman cawpüśha puchcacá manamá fäsillachu laćhunman.
Yaćhayniyu caypis yanꞌalmá
13 Mandacü luclu awquishca anyapaycunactapis mana munäcäpïtá,
mas allin waccha calpis yaćhayniyu walaśhcämi.
14 Chaynu walaśhca,
waccha caśhanpi allinmanmi ćhanman;
masqui carsilpi yalamü cayalpis mandacülämi canmanpis.
15 Chaynütacmi cay allpäćhu licalá,
mandacücäpa pudir atimünin walaśhcäman lluy-lluy nunacunaca jucllachaculcäśhanta.
16 Manaña camacaycü nunacunamá payta atipäcula;
chaypïta ipa wiñaycunaca manañamá paywan cushishachu capäcula.
Chaypis yanꞌal-yanꞌalmá;
waywäta chalay munaśhanchicnümá.