Lluy imapäpis timpun cayanmi
3
Cay allpäćhu lluy ima pasananpäpis timpu cayanmi;
imacta lulanapäpis timpu cayanmi:
2 Cayanmi timpu näsinapä ütac wañunapäpis.
Cayanmi timpu lantanapä ütac lantaśhacta chutanapäpis.
3 Cayanmi timpu wañuchinapä ütac jampinapäpis.
Cayanmi timpu pampaman muyuchinapä ütac śhalcachinapäpis.
4 Cayanmi timpu waꞌanapä ütac asinapäpis.
Cayanmi timpu lutucunapä ütac tuśhucunapäpis.
5 Cayanmi timpu lumicta chapinapä ütac juntunapäpis.a
Cayanmi timpu macallanapä ütac mana macallanapäpis.
6 Cayanmi timpu ashinapä ütac jitanapäpis.
Cayanmi timpu ćhulanapä ütac wicapanapäpis.
7 Cayanmi timpu laćhyanapä ütac jilanapäpis.
Cayanmi timpu upälla canapä ütac limanapäpis.
8 Cayanmi timpu cuyanapä ütac ćhïninapäpis.
Cayanmi timpu gïrrapä ütac jawca canapäpis.
9 ¿Nunaca ancha-anchap lulayalpis imactamá julucun?
10 Licayculá sasa-sasa lulayta nunacunäman Tayta Dios uycamäśhanchictamá.
11 Tayta Dios lluy imactapis timpullanćhümá tuqui-tuquicta lulaycula.
Jinaman punta,
canan,
śhamü timpucunäta tantianapäpis tantiayta uycamälanchicmá.
Chaynu cayaptinpis allaycuyninpi aśhta camacaynincama Tayta Diospa lulaśhancunacta tantiayta nunaca manamá atipanchu.b
12 Nunäpa lulaynin cawsaśhancamá cushicuywan allin cäcunällacta lulaycuymi.
13 Nunäpä mas allin canman micucunan,
upyacunan,
lluy ima lulaśhanpïpis cushicunanmá.
Caypis Tayta Diospa munayninpïmari śhamun.
14 Tayta Dios lluy lulaycuśhancunaca wiña-wiñaypämi.c
Manamá imapis yapaycunachu nï juluycunachu.
Chaynüta Tayta Dios lulaycula nunacunaca manchacuywan licaycälinanpämá.
15 Canan caśhanca calañamá;
śhamücäćhu cananca cayanñamá.
Caśhan cutiticlalinanpämari Tayta Dios unanchaycula.
Nunapis uywapis chayllamanmá liyalcan
16 Cay allpäćhu caycunactapis licalämi:
Cäraycunancäćhu mana allincällamá cayan;
tincüllanman licaycuycäćhüpis mana allin licaycuyllamá cayan.
17 Chaymi śhunꞌüćhu niculá:
“Lluy ima lulaśhanpïpis allin ütac mana allin nunätapis Tayta Dios cäraycunꞌam.
Imapis timpullanćhümi pasaycun;
ima lulaypis timpuyüllamari” nil.
18 Chaynütacmi niculá:
“Nunacunaca uywacunänülla caśhanchicta tantiacunapämi Tayta Dios tantiaycachimanchic” nil.
19 Rasunpa,
nunapis uywapis chayllamanmá liyalcan.
Pulanmi cawsapäcun;
pulantacmi wañupäcunpis.d
Chayurá uywacunäpïta maschu manamá nunaca.
Lluypis yanꞌal-yanꞌalmá.
20 Pulanpis chayllamanmi ćhäyalcan:
Allpapïtam lulaśha capäcula;
allpämantacmi cutipäcunꞌapis.e