3 Yaćhaycäta mana caćhaycullalmi aychäta bïnu upyaywan cushichiyta ashiyculá.

Chaynüpamari cay allpäćhu ash timpulla caśhancama nunaca imanuypa allin cawsaśhantapis tantiaycuyta munalá.

4 Sumä-cama lulaycunactamari lulacülá:

Wasicunactam śhalcachilá,^a

üba lantacunactam lantalá,

5 ćhaclacunacta wirtacunactam lulacülá,

chaycunaman micunapä wayuyniyu imaymana lantacunactam talpucülá.

6 Chaynütacmi chay achca lanta wiñashancunäta rïganäpä istanquicunactapis lulacülá.

7 Uyway umrictapis walmictapis lantilämá;

wasïćhu näsi uyway nunäcunapis calamá.

Chaynütacmi Jerusalenćhu punta mandacücunäpïpis mas-maslä wäcäcunapis uwishnïcunapis cacula.^b

8 Ürucunactapis,

illaycunactapis achca-achcactamá juntucülá;

juc nasyuncunap mandacünincunap lluy cänincunactamá tawacülá.^c

Chaynütacmi taquï umrictapis walmictapis juntucülá,

jinaman imaymana tucanacunactapis lulachilá.

Chaynütac nunacunaca aychanpa munayninta lulaśhantanu lulalmi walmïcunapis achca cacula.^d

9 Sumä cäniyümi caculá;^e

Jerusalenćhu punta cäcunäpïpis mas-mas cäniyümi caculá.

Jinaman yaćhayca jinallamá yaꞌaćhu caycula.

10 Ñawí munaśhanta imactapis lulayculämá;

śhunꞌú munaśhanta manamá manalcachilächu.

Lluy-lluy lulaśhäpïmá cushiculá;

chayllactamá ancha-anchap lulaycuśhäpi juluyculá.

11 Chaypïta lluy lulaśhäcunactam licayculá;

maynu-maynu ñacaywan lulaycuśhäcunactapis licayculämi.

Chaynu sumäta tantiayculmi yaćhalá lluypis yanꞌal-yanꞌal caśhanta,

waywacta chalayta munaśhanchicnülla caśhanta.

Cay allpäćhu maynu-maynu ñacalpis imactapis manamá julucunchicchu.

12 Chaypïta yaćhaycäta tantiaycuytam llapan śhunꞌüwan caśhan ashiyculá;

chaynütacmi mana allincunätapis,

luclu caycunactapis lisiyculá.

¿Ipa śhamü mandacüca imactamá lulaycunꞌa?

Manamá imactapis lulanꞌañachu sinuꞌa lluy lulaśha cäcunällactañamari.

13 Chayurá caytam licaycú:

maynümi acchica mas allin tutapäcäpïta,

chaynümi luclu caycäpïta mas allin yaćhayca.

14 Yaćhayniyüca ñawin quićhacüśhamá cayan;

luclüñatacmi ichá tutapäcäćhu puliyan.

Chaynütacmi tantiaycú ishcaynintapis chaynülla imapis pasananta.

15 Chaymi quiquillá niculá:

“Luclüta pasaśhannüćha yaꞌactapis pasamanꞌa.

Chayurá ¿imapämá ancha-anchap yaćhayniyu caśhäpis bäliman?

Caypis yanꞌal-yanꞌalmá.

16 Yaćhayniyücätapis luclütapis manamá mayanpis wiña-wiñaypä yalpanꞌachu;

śhamü timpucunäćhu lluymá unꞌälälinꞌa;

yaćhayniyücäpis luclupis chaycuscamá wañupäcunꞌa” nil.

17 Chaymi cay cawsaycäta ćhïnicuyman ćhälú;

cay allpäćhu lluy ima lulaśhäcunapis millanaśhmá.

Rasunpa lluy imapis yanꞌal-yanꞌalmá;

waywäta chalayta munaśhanchicnümá.

18 Chaynütacmi cay allpäćhu lluy ima lulaśhätapis ćhïnicuyman ćhälú;

lluy chaycunacta atïní mandacücämanćha caćhaycuná canꞌa.

19 Masqui luclu calpis ütac yaćhayniyu calpis cay allpäćhu maynu-maynu ñacaywan yaćhaywan talishätamá duyñuchacuycunꞌa.

Caypis yanꞌal-yanꞌalmá.

20 Cay allpäćhu lluy lulaśhäta licayculmi llaquiculá,

ancha-anchap ñacaywan lulaśhäpïta.

21 Nunaca sumä yaćhaywan,

tantiaywan,

allinta lulaycuśhancätamá imallactapis mana lulä nunaman caćhaycunꞌa.

Caypis yanꞌal-yanꞌalmá;

mana allinmá.

22 Chayurá ¿imactamá nunaca julucun cay allpäćhu ancha-anchap lulaśhanpi,

pinsamintucuśhanpi?

23 Walan-walanmá ñacayllaćhu cayan.^f

Lulaynincuna sasa-sasamá;

tutanpapis mana jamayculñamá muspapacuyan.

Caypis yanꞌal-yanꞌalmá.

24 Nunäpa mas allin canman micucunan,

upyacunan,

lluy ima lulaśhanpïpis cushicunanmá.

Caypis Tayta Diospa munayninpïmari śhamun.^g

25 Pay mana munaptinꞌa ¿mayanmá cushicunman,

micunman,

upyanman?

26 Tayta Dios munalmi mayantapis yaćhayta,

tantiayta,^h

cushicuytapis uycun.

Juchasapa nunätañatacmi caćhaycun lluy ima cänincunactapis masta-masta juntucunanpä;

chaytam allinpä licaśhancunäman Tayta Dios uycun.ⁱ

Caypis yanꞌal-yanꞌalmá;

waywäta chalay munaśhanchicnümari.