Wañuyca lluypämi
9
Lluy caycuna imanuy caśhantapis llapan śhunꞌüwanmi tantiayculá.
Allin nunacunaca yaćhayniyücunaca jinaman lulaynincunapis Tayta Diospa maquillanćhu caśhantamari tantiaycú.a
Nunaca śhamü timpućhu cuyaśha ütac ćhïnisha canantapis manamari yaćhanchu.
2 Lluypis chayllamanmá liyanchic:
allin cawsäpis mana allin cawsäpis,
allin nunapis mana allin nunapis,
chuya nunapis anla nunapis,
uycunacta uycücäpis uycunacta mana uycücäpis,
juchannäcäpis juchayücäpis,
limalicücäpis mana limalicücäpis.
3 Cawsaśhanchic allpäćhu cay mana allincämá cayan:
Lluy-lluypis chayllamanmá liyalcan;
nunacunäpa śhunꞌun mana allincällawan juntäśhamá cayan;
umanćhüpis luclu cayllamá cayan.
Chaynu cayalcalmá wañuycäćhu camacapäcunꞌa.
4 Cawsäcunaca mayanninta aclaycälinanpäpis cayanlämá.
Maynümi limaypis “wañüśha liyunpïtá mas bälin cawsayä allꞌum” niyan.
5 Cawsäcunaca juc muyun wañupäcunanta yaćhaycälinlämá;
wañüśhacunäñatacmi ichá imactapis manaña yaćhapäcunchu,
nïtac imactapis alcaycälinchu;
unꞌäśhañamá cayalcan.
6 Cuyacuynin,
ćhïnicuynin,
sumä-sumä wañupacuynin camacälunñamá.
Chaymi cay allpäćhu imactapis caśhan lulapäcunanpä manaña canñachu.
7 Chayurá lluy lulaśhayquicuna Tayta Diospä śhunꞌunpänu cayaptinñá cushishañari micunayquita micuy;
cushishañari bïnuyquita upyay.
8 Imaypis tuqui allin müdanawanb müdacuy;
umayquimanpis pirfümicta ćhulacuy.
9 Cay allpäćhu pasacü timpullacta Tayta Dios uycamäśhanchicćhu cuyaśhayqui walmiquiwanꞌari imaypis cushicuy.c
Awari,
cay allpäćhu ñacaywan lulaśhayquipiꞌa cushisha allin cawsaśhallayquimari päguyqui.
10 Lluy imapis lulanayquipä caśhancäta llapan callpayquiwan sumäta lulaycuy;
lishayqui wañuycäćhuꞌa manañamá ima pinsaypis,
lulaypis canꞌañachu;
nï yaćhaypis,
tantiaypis canꞌañachu.
11 Chaynütacmi cay cawsaycäćhu licayculá caycunacta:
Llallinacuyćhu allicta cürricächu manamá llallin;
pilyayćhu sumänincächu manamá llallin;
yaćhayniyücäpis manamá lluy timpuchu micunanta talin;
allin tantiayniyücäpis manamá lluychu cäniyu;
allin yaćhaycachisha cäcunäpis manamá lluychu allinpä licaycuśha.
Allin ütac mana allin timpupis lluymanmari ćhaycun.
12 Mana allin timpucuna imay śhamunantapis nunaca manamá yaćhanchicchu.
Maynümi challwacunaca ütac ulpaycunaca unꞌaypi trampaman palpülälin,
chaynümi nunäpis timpuca ćhämuptin unꞌaypi mana allinman palpülälin.
13 Chaynütacmi cay allpäćhu juc yaćhaytapis yaćhaycul äśhalayllaman camälú:
14 Juc malcam ashllay nunayülla caña;
chayman sumä pudirniyu mandacüca śhalcamulmi murällap muyülïninman ishpipäcunanpä sumä ćhulälälin.
15 Chay malcaćhüñatacmi yaćhayniyu waccha nuna caña.
Paymari yaćhayninwan malcacta salbaycula;
ñatac waccha caśhan-laycumá mayanpis mana yalpalculachu.
16 Yaꞌañatacmi ní:
“Masqui wacchap yaćhaynin mana cäpa licaśha cayaptinpis,
limaynin mana uyaliycuśha cayaptinpis yaćhayniyud caymi mas allin callpasapa caypïtá” nil.
17 Yaćhayniyücäpa tuquillap limapayninmá
mas allin luclu mandacücäpa apalcaćhayninpïtá.
18 Pilyapä cä armacunäpïtá yaćhaycämi mas allin.
Ñatac jucllay mana allin lulayllamá achca-achca
allin cäcunäta mana caśhanman muyüchinman.