Mandacü Lemuelpa limapaynincuna
31
Masa lädup mandacünin Lemuelpa limapaynincunam;
cay limapaycunacta mamanmi caynu yaćhachila:
2 Iju,
waćhacuśhá walaśhní,
Tayta Diosman limalicuśhá walaśhní,
3 walmicunäwan callpayquita amari usuyächiychu;
mandacücunacta palpuchï walmicunäwan amari cayaychu.
4 Mandacü Lemuel,
manamá allinchu mandacücunaca
bïnucta upyaylla-upyaśhan,
nï puydïcunaca trägullawan cawsaśhanpis.
5 Yanꞌalmi camachicuyta unꞌaycul
lluy wacchacunäta jalutaculcanman.
6 Wañuypa patanćhu cäcunäpämá träguca;
llaquillaćhüña cawsäcunäpämá bïnuca.
7 Chaynu upyapäcul llaquicuyninta unꞌapäcunmá;
ñacaynincunacta manañamá yalpapäcunñachu.
8 Mana mayanpis limalcünin nunacunäpïta am limalcuy;
mana mayanpis yanapänin cäcunäta tincüninman licaycuy.
9 Amari upälla cayaychu;
tincüninman-cama cäraycuy;
wacchacunätawan mayanllapis mana yanapänin cäcunätari yanapaycuy.
Allin walmica alawaycuśham
10 Tantiayniyu allin walmicta ¿mayćhülä taliycuchwan?
Sumä ćhaniyu tuquish lumicunapïtapis mas-mas ćhaniyülämá.
11 Chaynu walmimanꞌa wayapanmi llapan śhunꞌunwan chalapacun;
paywanꞌa manamá imallanpis pishiycunchu.
12 Paymi cawsaśhancama allinllacta wayapanpä lulaycun;
manamá imaypis mana allinnintá lulaycunchu.
13 Paymá millwacunacta,
lïnucunacta ashiycul
cushishalla sumäta puchcaycun.
14 Payꞌa nigusyanti barcunümá,
wasinpä micuyta maypïtapis apaycamun.
15 Tutay-tutayllamá śhalcun wawincunacta micachinanpä,
chaynütac uywaya nunancunactapis micaycachinanpä.
16 Lantipä ćhacla caśhanta sumäta licapayculmá lantin;
südayninpa ćhaninwanmá übactapis lantachin.
17 Wiꞌawninta sumä ćhïlay-ćhïlayta watapacuyculmi
callpa-callpawanlä lulayta allaycun.
18 Nigusyuncuna allin lishantamá tuquicta yaćhaycun;
acchinpis tutay walächi acchiyaptinmi lulay-lulay cayan.
19 Jucnin maquinwanmá callacta aptilan,
juccäwanñatacmi puchcacta muyuchin.
20 Wacchacunäman imallactapis chacchaycuyanmá;
pishipacücäman imallactapis uycuyanmá.
21 Laśhta ćhäcamuptinpis ayllunpi manamá llaquicunan canchu;
lluy ayllunmá ćhaniyu puca lacta müdanawan unuy-unuy puliyalcan.
22 Lancacuncunactapis quiquinmá awan;
fïnunnin lïnupi,
murädu müdanacunawanlämi müdacunpis.
23 Puydïcunap juntunacuynincunaćhüpis wayapan lisisha,
jinaman allinpä licaśhamá.
Yaśhacunäwan cuscamá licaycunapä cäcunacta licaycuyan.
24 Müdanacunacta lïnupi lulalculmi lanticun;
waćhacucunacta awalculmi nigusyanticunäman lanticun.
25 Callpawan,
allinpä licaśha caycämá payćhu chaspuyan;
śhamü muyuncunapïtapis manamá llaquicunan canchu.
26 Limalpis yaćhaywanmá limaycun;
yaćhaycachilpis cuyacuywanmá yaćhaycachin.
27 Wasinćhu imanuy caśhantapis tuquictamá licaycuyan;
pay manamá imactapis mana lulallal täcucunmanchu.
28 Wawincunapis altumanmi julaycälin.
Wayapanpis alawaycunmá:
29 “Achca walmicunamá allinta lulaycälin.
Ñatac amwanꞌa mayanpis manamá tincuycachisha canmanchu” nil.
30 Walmicunap tuqui cayninꞌa camacällam,
munapaśhlla cayninꞌa pasacüllam.
Tayta Diosta manchacü walmïñatacmi ichá alawäśha canꞌa.
31 Lluy lulaycuśhancunapi altuman juluycuśha cachun.
Lluy luśhancunapïta malcap yaycunancunaćhu allinpä licaycuśha cachun.