Agurpa limapaynincuna
30
Caycunam Massa lädućhu yaćha Jaquep chulin Agurpa limapaynincuna.
Agurmi Itieltawan Ucalta caynu limapäla:
2 Rasunpa lluypïtapis mas luclunninmi cá;
mana tantiayniyu nunanümi cá.
3 Yaćhayniyu cayman manalämá ishpilpüchu;
Chuya Tayta Diostapis manamá lisiyculächu.
4 ¿Mayanmá sïlüta ishpil caśhan cutilpamula?
¿Pitá waywäta maquinćhu aptilanman?
¿Pitá yacucunäta catanwan ipichanman?
¿Mayanmá jinantin allpäpa culindancunacta tacyaycachila?
¿¡Paypa śhutinta yaćhayanquićh aw!?
¿¡Mayan chulin caśhantapis yaćhayanquićh aw!?
Má,
niycamayꞌari.
5 Tayta Diospa lluy nishancuna,
chalapacuna chuya caśhantamá camalachicun.
Chalapacünincunapä Tayta Dios pacaycüninmá.a
6 Pay nishancunaman ama imactapis yapaycuyaychu;
yanꞌalmi millapäśhunquiman,
artishpä licäśhunquiman.
7 Tayta Diosllay,
manaläpis wañuśhäcama
awniycallämänayquipä ishcayllactam mañacamuc.
8 Casquicuycäta yaꞌapi japächaycuy.
Wacchaman nï rïcuman ama muyuchillämaychu.
Aśhwanpa muyun-muyun micunäpa caycuchun jinalla.b
9 Imapapis janallanćhu cawsaycachimaptiquiꞌa,
ampi lluy śhamuśhanta unꞌälümanpis canćha.
Ñatac imäpis mana captinꞌa,
suwaculćha Tayta Diosnïta pinꞌayman ćhuläman.
10 Duyñunpa puntanćhu uyway nunäta ama acusaychu.
Yanꞌalmi mana allin canayquipä nishuptiqui,
mana allinca ćhäśhunquiman.
11 Waquincunamá taytanta mana allin cananpä nipäcun;
maman allin cananpäpis manatacmá nipäcunchu.
12 Waquincuna sumä chuya allintuculcanmá.
Ñatac mana chuyanchacuśha anlamari cayalcan.
13 Waquincunamá sumä nunatuculcal
mana cäpa juccunäta licapäcun.
14 Waquincunap quiluncuna ispädanümá,
wäsuncunapis cuchillunümá.
Cay allpäćhu cä wacchacunäta,
pishipacüśha cäcunätamari camacapäcun.
15 Yawarta śhuꞌu culup ishcay shimincuna,
ishcay läga wawincunanümá:
“Umay-umay” niyalcan.
Quimsa cäca imaypis manamá maćhaycälinchu;
tawa cäcäpis manamá:
“Chayllapäñam” ninchu.
16 Chaycuna cayalcan:
sipultüraca,
machüra walmica,
chaqui allpaca,
jinaman walayä ninäpis manamá “chayllapäñam” ninchu.
17 Taytanta mana allinpä licäcätá,
maman yaćhachishanta jamuyäcätá,
ancacunaca ñawinta julüchun,
wisculcunacac micüchun.
18 Quimsa licchäpïmi äśhalayllaman camá;
tawa licchätam tantiayta mana puydïchu:
19 Sïlüćhu ancaca mayninpa pälishanta,
wancacunäćhu culibrayca mayninpa pulishanta,
lamarćhu barcuca mayninpa lishanta,
wamlacta walaśhca cuyaśhantapis.
20 Mansibädu walmicá caynümi lulan:
Maćhacuycul shiminta pichaculculmi ninla canpis:
“Manamá ima mana allintapis lulalächu” nil.
21 Quimsa licchämi cay allpäta catcatachin;
tawa licchäñatacmi sumä chucchuchin:
22 Uyway nuna mandacüman ćhäca,
micuypa janallanćhu licalï lucluca,
23 jamuyäśha walmi casaracüca,
patrünanpa wayapanta quitä uyway wamlaca.
24 Tawam cay allpäćhu mana ancha jatućhä-cama cayan;
ñatac yaćhayniyücunäpïpis mas yaćhayniyülämi capäcunpis:
25 Chiquishcunaca mana callpasapa cayalcalpis,
chaqui timpućhuꞌa micunancunacta pilwaculcanmá.
26 Biscachacunaca mana callpasapa cayalcalpis
wancacunäćhülämá wasinta lulapäcun.
27 Paćhcaśhcunaca mandänin mana captinpis,
tuqui fïlallamá lipäcun.
28 Añärucunaca aptilcuylla cayalcalpis
mandacücäpa palasyuncunaćhülämi yaćhapäcunpis.
29 Quimsam ichanllanpa pulipäcun,
tawäñatacmi balaquïrula pulinpis:
30 Lluy uywapapis manchaynin,
imapïpis mana ayiyä liyunca,
31 balaquïru gälluca,
ulu capishca,
pilyänincunap puntanta ñawpä mandacüca.
32 Luclunu mana allin lulanayquipi alawacuyalꞌa,
shimiquita chapacuycul amaña limayaychu.
33 Lichicta cuwajäcá quïsuctam julun,
sinꞌanta tacacücá yawartam yalachin,
piñachiyta jicutäcá pilyaytam talcachin.