yaćhachishäta umayquiman ćhulaycuy.

2 Yaćhaycäman linliquita ćhulaycuy;

allincäman śhunꞌuyquita ćhulaycuy.

3 Allin yaćhaycäta ayacuy;

allin tantiaycäwan apachicuy.

4 Illaycätanu ashiycuy;

tapäda-yupaytanu ashiycuy.

5 Chaynüpamá Tayta Diosta manchacuywan cäsucuyta yaćhaycunqui;

quiquin Tayta Diostapis lisiycunquimá.

6 Tayta Diosmá yaćhaycäta uycüca;

shiminpïmá allin tantiaycäwan yaćhayca yalamun.

7 Paymá allin cawsäcunäta yaćhayta uycun;

allincämannu pulïcunäta imapïpis atajaycun.

8 Paymá allincunäpa puliyninta licaycun;

paymá chalapacünincunap caminunta ñawillanćhu caycachin.

9 Chaynu calꞌa tantiaycunquim ima allin caśhanta,

tincüninman caśhanta,

mayanman mana śhalcuytapis;

jinaman ima allintapis taniaycunquimari.

10 Yaćhaycämi śhunꞌuyquiman yaycuycunꞌa;

tantiaycämi cawsayniquita cushichinꞌa.

11 Allin tantiaycämá licaycuśhunqui;

yaćhaycämá cuydaycuśhunqui.

12 Yaćhaycämá mana allin caminucunapïta libraycuśhunqui;

mana allin limä nunacunäpïtamá licaycuśhunqui.

13 Allin caminucta caćhaycul mana allincunallaćhu

pulïcunäpïta yaćhaycämá licaycuśhunqui.

14 Mana allin lulaśhanpi cushicücunäpïta yaćhaycämá licaycuśhunqui;

mana allin lulaśhanpi fistachacücunäpïta yaćhaycämá ñawillanćhu caycachishunqui.

15 Chaynütacmá mana allin caminucunaćhu pulïcunäpïta,

allincäpi pintïshacunäpïta licaycuśhunqui.

16 Yaćhaycämá mana allin walmipïta libraycuśhunqui,

maypis aticuna mishqui-mishqui limayniyu walmipïta.^a

17 Chaynu walmica lasac cayninćhu cuscaśhan wayapantapis caćhaycülunmá;

Tayta Diosman limalicuśhantapis unꞌälunmá.

18 Chay walmip wasinman liyca wañuycämanmá puśhayan;

caminuncuna wañücuna caśhancämanmá ćhäyächin.

19 Chay walmiwan cäcá manañamá imaypis cutimunꞌañachu;

manañamá cawsayman puśhä caminup puliycunꞌañachu.

20 Chayurá iju,

allin caminunninpa puliycuy;

allin nunacunaca cawsaśhannu cawsaycuy.

21 Allin luläcunällamá cay allpäćhu cawsapäcunꞌa;

mana juchayücunällamá cayćhu capäcunꞌa.

22 Mana allin luläcunäñatacmi ichá cay allpäpi alüśha capäcunꞌa;

ishcay cäracunäñatacmi ichá wicapäśha capäcunꞌa.^b