Tayta Diosllamanmi llaquipaycamänanpä ayaycaćhaypa ayacullá.

2 Paypa ñawpäninmanmi quijäcunacta ćhaycachillá.

Paypa puntanmanmi llaquicuynïcunacta ćhulaycullá.

3 Tayta Diosllay,

pasaypi cayaptïpis

mayninpa linäpäpis am tuquictamá lisiycunqui.

Pulishá caminücunämanmá trampacunacta ćhïnimänïcuna ćhuläläliman.

4 Allï lädüta licalcuyꞌari;

manamá mayanpis yanapaycamäní canchu.

Manam mayanpis licaycamäní canchu.

Manam mayanpis yalpalcamäní canchu.

5 Am Tayta Diosllätam ayacamullac:

“Amllamá pacaycamäní canqui.

Cay cawsaynïćhu lluy-lluy munaśhäca amllamá canqui” nil.

6 Pasaypim cayällá,

uyaliycallämayꞌari.

Aticaćhamänïcunapïta libraycallämay,

paycuna yaꞌapïtapis mas munayniyü-camamá.

7 Cay ćhänalächimäśhanpi julaycallämay śhutiquita alawaycunacpä.

Chaynu allinpä licaycamäśhayquipïmari allin nunacunaca

cushicuywan muyülïnïćhu juntunaculcanꞌa.