Yanapaycamäní jucllaña śhaycamullay.

Ayacuylläta uyaliycallämay.

2 Mañacuyllá insinsiup mishqui

aśhnayninnu anman ćhaycamullächun.^a

Maquí chacchalcuśhanpis tardinpa uycuśhänu ćhaycamullächun.

3 Tayta Diosllay,

shimí imacta limananpïpis sujitaycallämay.

Allüta sujitamänanpä juc licäta ćhulaycallämay.

4 Mana allincäman śhunꞌullá muyuculcunanpïta japächaycallämay.

Mana allin lulaycunäćhu pulinäpïta licaycallämay.

Juyu nunacunäpä cumbidu lulapäcuśhanman amari jucllachaycamaychu.

5 Allin nunaca anyapaycamaptinꞌa allinnïpämá.

Lawćhaycamaptinꞌa umäćhu mishqui asaytinümá.

Chaytá cushishamari awniyculläśhä.

Mañacuynïñatacmi ichá mana allin nunacunäpa munayninta

Tayta Dios manalcachinanpä imaypis cayan.

6 Mana allin nunacunäpa puydï cäraycünincuna

aꞌaman^b wicapäśha capäcuchun.

Jinaptinmá anyapaśhäca rasun caśhanta tantiapäcunꞌa.

7 Chayćhümari nipäcunꞌa:

“Ćhaclaćhu äraptin

culpacuna wichïsha caśhancänümá tullücuna

mana pampaycuśha wichïsha capäcunꞌa” nil.

8 Chaymi Tayta Diosnillay,

amllaćhu ñawillá caycun.

Amllamanmi chalapacamullá;

amari unꞌaycallämaychu.

9 Mana allin nunacunaca trampa ćhulamäśhancunapïta licaycallämay.

Trampa maśhtapäcuśhancunapïta libraycallämay.

10 Mana allin nunacunaca trampa

lulaśhancunaman quiquincuna palpupäcuchun.

Yaꞌactañatac ichá chaycunapi allinllacta pasaycachillämay.