Masqui taytachacunap puntanćhüpis amllactamá

taquicunawanlä altuman juluycuśhayqui.

2 Llaquipayniyu chalapacuna caśhayquipi śhutiquita

alawaycunacpämá alawana wasiqui läduman unꞌulayculläśhä.

Limayniquitawan śhutiquitamá lluy imapïtapis

mas altunninmanlä juluycunqui.

3 Ayacamuptïmá uyaliycallämälanqui.

Mañacamuptïmá callpanchaycallämälanqui.

Cawsaynïtapis caśhanmi cutipacachimälanqui.

4 Tayta Diosllay,

jinantin allpäćhu

mandacücunämá shimiquita uyalipäcul alawapäcuśhunqui.

5 Lluy lulaśhayquicunapïtamá

Tayta Diosllay altuman julaycälishunqui.

Awari,

Tayta Diosllay sumä cayniqui jatu-jatunmá.

6 Mana nunatucücunäta Tayta Dios janay pachäpïtalämá ñawillanćhu caycachin.

Nunatucücunätañatacmi ichá calullapïta licaycun.

7 Sumä llaquicunap intüśha cayaptïpis anmari cawsaycachillämanqui.

Ćhïnicünïcunap piñacuyninpïtapis anmá maquiquita ćhulaycul maquillayquiwantac salbaycallämanqui.

8 Tayta Diosmá lluy limalicamäśhanta lulaycunꞌa.

Tayta Diosllay,

llaquipäcuyniqui wiña-wiñaypämá.

Ampa lulacuśhayquimá cayällá.^a

Amari unꞌaycallämaychu.