ñacaynincunapïtapis yalpalcullayꞌari.

2 Tayta Diosman limalicuśhanta yalpalcullayꞌari.

Jacobpa sumä munayniyu Tayta Diosninman

limalicuśhanta licaycullayꞌari.

3 Paymari caynu limalicula:

“Yaćhaśhá wasïman manamá yaycuycuśhächu.

Puñunäćhüpis manamá jitalaycuśhächu.

4 Ñawïtapis manamá wićhaycuśhächu

nï uchuyllactapis imchiycuśhächu,

5 Tayta Diospä sularninta talinäcama,

Jacobpa sumä munayniyu Tayta Diosninpä

yaćhananta talinäcama” nil.

6 Limalicuśhan babulca Efrataćhu caśhantamá uyalïlälí.

Quiriat-yearim lädućhümá talïlälí.^a

7 ¡Tayta Diospa carpanman lishun!

¡Ñawpäninman unꞌulacuycul uyshuycuśhun!

8 Tayta Diosllay,

śhalcuyñari.

Munayniyu babulniqui caśhan

sityuman śhamuyñari jamanayquipä.

9 Sasirdütiquicuna allin lulaycunäwan müdaculcächun.

Chuya nunayquicuna cushicuywan alawapäcuchun.

10 Nunallayqui Davidta cuyaśhayqui-laycuꞌari

japächacuśhayqui mandacücäta ama ipanchaycuychu.

11 Tayta Dios Davidman sumä limalicuśhanta

manamá ipaman cutichinꞌachu.^b

Paymari nila:

“Milayniquipïmi jucninta

dispächuyquiman taycaycachishä.

12 Limalicuśhäta chuliquicuna lulaycäliptin,

yaćhachiśhäcunactapis uyaliculcaptinꞌa milaynincunapis

dispächuyquićhu wiña-wiñaypämi taycaycälinꞌa” nil.

13 Sionta Tayta Diosmá aclaycula.

Chayćhu yaćhananpämá aclaycula caynu nil:

14 “Caymi wiña-wiñay yaćhanäpä canꞌa.

Cayćhu yaćhanäpämá munayní cala.

15 Micuynincunacta achcamanmá milaycachishä.

Wacchacunätapis maćhaycunancamamá micaycachishä.

16 Chaynütacmi sasirdütincunactapis

sumä llalliycunawan müdachishä.

Chalapacünincuna cushicuywanmá alawapäcunꞌa.

17 Chayćhümá Davidpa milayninpïta munayniyu mandacücäta chillquichimuśhä.

Chayćhümá japächaycuśhäca wiña-wiñaypä acchiycunꞌa.^c

18 Paypa mandacuyninꞌa sumämá waytaycunꞌa.

Ćhïnicünincunactañatacmi ichá pinꞌacuyćhu uyshulächishä” nin.