Cushisham capäcun Tayta Diosta manchacücunaca.

Cushisham capäcun yaćhachicuynincunacta ćhaninchäcunaca.

2 Milaynincunamá cay allpäćhu munayniyü-cama capäcunꞌa.

Allincäćhu cäcunäpa milaynincunamá allinpä licaycuśha capäcunꞌa.

3 Wasinćhu cänincunapis alli-allimá caycunꞌa.

Tincüllanman lulaycuśhanpis wiña-wiñaypämá caycunꞌa.

4 Tutapäcäćhu cayaptinpis achquimá paycunaman ćhämunꞌa.

Llaquipayniyu,

tincüllanman lulaycü,

cuyacü allin nunätamá achquiycunꞌa.

5 Allin nunacá llaquipaycunmi,

mañaycunmi.

Ima lulaynincunactapis cällanman-cama lulaycuptinmá ima lulaśhanpis allinlla yaluycun.

6 Chaymi allin nunaca imaypis yalpaśha canꞌa.

Manamá imaypis mana allincäman palpuycunꞌachu.

7 Mana allin willacuycunacta manamá manchacunchu.

Tayta Diosmanmá masïsu llapan śhunꞌunwan chalapacun.

8 Chalapacuynin masïsumá cayan,

manam imacta manchacunan canchu.

Ćhïnicünincuna camacaycüśha caśhantalämá licaycunꞌapis.

9 Mana cäniyücunäta yanapaycunmá.

Tincüninman licaycuynin wiña-wiñaypämá.

Allin caynin wiña-wiñaypämari.

10 Mana allin nunacunäñatacmi ichá chayta lical,

caćhupacuycul-caćhupacuycul sumä piñacuyalcal chincaculcanꞌa.

Jinaptinmá munaśhancuna mana caśhanmanña muyunꞌa.