Sumä munayniyu altunninćhu cä Taytallay,

maynu sumä tuquim śhutiquita alawaycuy,

2 cuyacuyniyu caśhayquita wälanpa willaycuy,

chalapacuyniyu caśhayquita tutanpa willaycuy.

3 Maynu sumämi uchuy arpacunawan alawaycuy.

Ima sumä allinmi imaymana arpacunawan taquiycuy.

4 Tayta Diosllay,

sumä-cama

lulaycuśhayquicunäwanmá cushiycachimanqui.

Lluy lulaycuśhayquicunäpïtamá cushisha alawaycuśhayqui.

5 Tayta Diosllay,

¡sumä-camamá lulayniquicuna!

¡Maynu jatu-jatunmá tantiayniquicuna!

6 Tullu umacunällamá mana tantianmanchu.

Luclucunällamá mana yaćhanmanchu.

7 Chaynütac mana allin nunacunaca ulanu tuqui chillquipämuptinpis,

pasaypi juyu nunacunaca waytanu sumä

waytapämuptinpis wiña-wiñaypä camacaycüśha capäcunantapis manamá yaćhapäcunchu.

8 Am Tayta Diosñatacmi ichá wiña-wiñaypä

altuman juluycuśha canqui.

9 Tayta Diosllay,

ćhïnicüniquicuna

rasunpa mana caśhanman muyuchishamá capäcunꞌa.

Mana allin luläcunaca chiꞌichishamá capäcunꞌa.

10 Amñatacmi puꞌuśha munti wäcap callpantanülä callpacta uycamanqui.

Mishquilla aśhnä asaytiwanlämi umäman chächuycamal japächaycamanqui.

11 Ćhïnicünïcuna imanuypa palpupäcuśhantapis ñawí licaycunꞌamá.

Cunträcuna llallichicüśha apalcaćhaśhantapis linlí uyaliycunꞌamá.

12 Allin nunacunäñatacmi ichá palmïracunänu waytapäcunꞌa,

Libanoćhu cä cedrocunänu wiñapäcunꞌa.

13 Allin nunacunaca Tayta Diospa wasinćhu lantäśhanümá caycälinꞌa.

Tayta Diospa patyunćhümá waytaycälinꞌa.

14 Awquish cayninćhüläpis wayuycälinꞌamá.

Imaypis birdiy-birdiy,

lunluy-lunluymá caycälinꞌa.

15 Chaymá willaculcanꞌa:

“Tayta Dios tincüninman licaycü allinmi.

Paymi wancanu pacaycamäní,

payꞌa manamá mayanmanpis śhalcuyanchu” nil.