Wañuycäpi libraycunanpämi mañacun
Ishyaycunaćhu cayal Corepa milaynincuna taquipäcunanpä Ezra caśhta Heman isquirbishan taqui.
88
Salbaycamäní Tayta Diosllay,
tutay muyunmi mañacamullac.
2 Mañacuylläta ćhasquiycallämay.
Ayacuylläta uyaliycallämay.
3 Mana allincunäwan intüśhamá cayällá.
Wañuypa patanćhümá cayällá.
4 Wañüśhactanüñamá licayalcäman.
Pasaypi mana callpayüñamá cayällá.
5 Wañüśhacunäwan jitäśhanüñamá cayällá.
Gïrraćhu wañüluptin pampäśhanüñamá cayällá.
Maquiquipi waycäśhañamá,
unꞌäśhayquinüñamá cayällá.
6 Luli-luli jatu-jatun ućhcunninmanmi jitaycämanqui.
Sumä yananyä manchanaśhninmanmi wicapaycämanqui.
7 Piñacuyniquiwan ñitïsham cayällá.
Yacu sumä-sumä mächimücäwanmi ñitiycächimanqui.
Selah
8 Lisinacuśhäcunacta yaꞌapïta calupächinquimá.
Paycuna millachicamänanpämá muyüchimanqui.
Yaluyta mana atipalmari wićhalayá.
9 Waꞌay-waꞌay cayaptïmá ñawilläpis aspalpuyanña.
Walan-walanmá am Tayta Dioslläta mañacamullac.
Amllamanmi maquilläta chacchalcamullá.
10 ¿Wañüśhacunäpa milagructa lulaycuyanquimanlächun imatá?
¿Wañüśhacunaca alawaycälishunayquipä
śhalcapämunmanlächun imamá?
Selah
11 ¿Llaquipäcuyniqui wañüśhacunämanchun willaycuśha canꞌa imatá?
¿Camacaycüśha canan ućhcu caśhancäćhüchun
rasun cayniquipi limaycuśha canꞌa imamá?
12 ¿Sumä tutawyaycäćhüchun milagru
lulaśhayquicunacta yaćhaycunꞌa imatá?
¿Manaña yalpanapä cayäcäćhüchun
tincüninman licaycuśhayquita yaćhaycunꞌa imamá?a
13 Tayta Diosllay,
yaꞌañatacmi ichá amllacta mañacamuc.
Aspi-aspiypïmi mañacuylläta amllaman ćhulaycamú.
14 Tayta Diosllay,
¿imapïmá mana cäpa licaycamanqui?
¿Imapïmá yaꞌapïta pacacuycunqui?
15 Müsu caynïpïmi pasaypi llaquillaćhu,
wañuycäpa patallanćhu caycullá.
Sumä manchanaśh ñacaycunapam pasaycachimanqui.
Isisí,
manañam mastá awantaycuyta atipälläñachu.
16 Sumä piñacuyniquim llüllanu juclla yaꞌaman ćhäman.
Sumä ñacachicuyniquim camacaycäman.b
17 Mayuca ticlaypa-ticlaśhannümi mana jamayculña muyülïnïćhu cayalcan.
Yacup ñitïshanümi cayällá.
18 Isisí,
lisinacuśhäcunätapis,
śhunꞌú tincuśhan
nunacunätapis yaꞌapïta japächälunquimá.
Cananꞌa tutawyaycällañamá lisinacuśhäpis cayan.