Taytallay,

amari upällacuycul jawca cayaychu.

2 Licayꞌari ćhïnicüniquicuna cuntrayqui wañupaculcäśhanta.

Cuntracüniquicuna sumämi jalutacuyalcäśhunqui.

3 Malcayquip cuntranmá casquillanwan limanacälälin.

Ama-pacha nishayquip cuntranmá umachanacälälin.

4 Caynümi nipäcun:

“Acuchun,

malcanta lluy camacaycämuśhun.

Israel lädup śhutin manaña yalpalcuśha cananpä chincächishun” nil.

5 Cuntrayquim juc nunanülla limanacälälin.

Juc śhunꞌullam lluy yaćhachinacälälin:

6 Edom,

Ismael,

Moab,

Agar lädu pilyäcuna,

7 Gebal,

Amon,

Amalec,

Filisteo lädu pilyäcunaca,

jinaman Tiro malcaćhu yaćhäcunäpis.

8 Paycunamanmi Asiria läducunäpis jucllachanacälälila.

Paycunamari Lotpa milaynincunap sumä yanapänin capäcula.

9 Lluy paycunacta camacaycüluy;

Madian nunacunäta,^a

Cison mayućhu Sisaractawan

Jabinta lulaśhayquitanuꞌari camacaycüluy.^b

10 Paycuna Endor lädućhümá camacaycüśha capäcula.

Ćhaclap wanunpäñamá muyülälila.

11 Sumä puydïnincunactañatac Orebtawan Zeebtanu camacaycüluy.^c

Puydïnincunactañatac Zebactawan Zalmunactanu pampaman muyüchiy.^d

12 Paycunamari nipäcula:

“Tayta Dios uycuśhan

allpancunacta duyñuchacuycuśhun” nil.

13 Tayta Diosnillay,

sumä waywa apäśhactanu paycunacta apächiy.

Chaqui päśhactanu waywäwan apächiy.

14 Maynümi munticta nina camacaycülun,

maynümi ninäpa sumbaynin ulꞌucunäta camacaycülun,

15 chaynuꞌari lücu tamyayquiwan aticaćhäluy.

Sumä-sumä waywayquiwan chucchüchiy.

16 Tayta Diosllay,

pinꞌayman ćhulaycüluy

amta ashiycälishunayquipä.

17 Pasaypipäña uyshulächisha capäcuchun.

Sumä pinꞌayćhuꞌari wañupäcuchun.

18 Ampa śhutiqui Tayta Dios caśhanta yaćhapäcuchun.

Jinantin allpäćhu amlla sumä munayniyüca caśhayquita lisipäcuchun.