Llaquicuyninćhümi mañacun
“Liryucunap” nishan tünunwan taquinapä Davidpa isuirbishan; taquïcunäpa puydïninpämi.
69
Tayta Diosnillay,
salbaycallämay.
Yacućhümi anualpuyälläña.
2 Sumä-sumä siniamanmi śhaticacüllá.
Manamá maycäman chalapacunäpis canñachu.
Luli-luli yacumanmi jiꞌalpüllá;
mayu lïcämi aysayälläman.a
3 Ayaycaćhaytapis pishipälüñamá.
Cuncäpis chascälunñamá.
Tayta Diosnïta alcayaptí ñawilläpis aspacalpunñamá.
4 Yanꞌalpi ćhïnimänïcunaca ächäpïpis mas-masñamá milälälin.b
Yanꞌalpi pampaman muyuchimayta munäcunaca
achca-achcamanñamá muyülälin.
Mana suwacuśhäpïtamá cutichinätapis munapäcun.
5 Tayta Diosllay,
am yaćhayanquimá luclunu caśhäta.
Juchäcuna ampïta manamá pacaycuśha canmanchu.
6 Sumä munayniyu Tayta Diosnillay,
chalapacüniquicuna yaꞌa-laycu amari pinꞌayćhu capäcuchunchu.
Israelpa Tayta Diosnin,
ashïniquicuna juchä-laycu
amari uyshulächisha capäcuchunchu.
7 Taytallay,
am-laycumá imaymana ñacayta pasalá.
Pinꞌacuypïmi cäräpis pampäćhu cala.
8 Wawꞌi-caśhäcunapä juc nunanüñamá cayá.
Mamäpa wawincunapä mana lisishanüñamá cayá.c
9 Alawana wasiquita cuyaynïwanmi sumä-sumä wañupacú.d
Cuntrayquicuna nishuśhayquicunämá yaꞌacta ćhaypa-ćhaycaman.e
10 Micuytapis caćhaycul waꞌaśhtin mañacuptïpis
paycuna jamuyapämanmi.
11 Llaquicuypi shicacü müdanawan
ćhulacuptïpis limacalcäman,
asipäcalcämanmi.
12 Puncućhu täcücunäpisf yaꞌallapïñam limaculcan.
Shincacunäpis yaꞌallapïñam taquincunaćhu sumachiculcan.
13 Yaꞌañatacmi am Tayta Dioslläta mañacamullac uyaliycamänayquipä.
Sumä llaquipayniquićhuꞌari yanapaycallämay.
Chalapacuna caśhayqui-laycuꞌari salbaycallämay.
14 Sumä siniaman jiꞌalpunäpïta julaycallämay.
Ćhïnicünïcunapïtawan sumä-sumä yacucunäpïta libraycallämay.
15 Mayuca amari apamächunchu.
Manchanaśh wayuca amari micamächunchu;
wañuyca amari millpamächunchu.
16 Tayta Diosnillay,
sumä-sumä llaquipayniyu caśhayqui-laycuꞌari uyaliycallämay.
Ancha-ancha cuyacuyniyu caśhayqui-laycuꞌari licaycallämay.
17 Cay uyway nunallayquipi amari pacacuycuychu.
Sumä ñacayćhümá cacuyällá;
jucllañari uyaliycallämay.
18 Aśhuycamulꞌari libraycallämay.
Ćhïnicünïcunap maquinpïtari julaycallämay.
19 Am tuquictamá yaćhayanqui palamäśhancunacta,
pinꞌayman ćhulamäśhancunacta,
jalutacamäśhancunactapis.
Yaćhayanquitacmá mayancuna ćhïnicünïcuna caśhancunactapis.
20 Chay palamäśhancunäwanmá śhunꞌulläpis llaqui-llaquiña cayällan.
Mana callpayu jucmanyäśhañamá cayällá.
Mayanpis llaquipaycamänanta ashiptïpis manamá pipis canchu.
Cunsuylaycamänanpä ashiptïpis manamá mayanpis canchu.
21 Micanämaptinpis jayaptamá micälächiman.
Yacunämaptinpis binagrictamá upyälächiman.g
22 Paycunap fistachacuynincuna quiquinpa cunca cuchuynincunaman muyuchun.
Trampancunaman licalichun palpupäcunanpä.
23 Manaña licapäcunanpä ñawincuna aspachun.
Lluy imawanpis ñitichicüśha pasaypi curculächunpis.h
24 Piñacuyniquita paycunamanꞌari ćhaycachiy.
Sumä timpuyä rabyacuyniquita paycunamanꞌari alcansachiy.
25 Yaćhanancunapis pulumächun.
Carpancunapis chunyachun.i
26 Llaquiman am ćhulaśhayqui nunactamá paycuna ñacachipäcun.
Dañädüśhayqui nunap nanayninpïmá äśhaycaćhapäcun.j
27 Chay mana allin lulaśhanpïta mana allincäwanꞌari cutiycachiy.
Tincüninman cäraycuyniquićhüpis cäraycuśhaläri cachunpis.
28 Paycunacta wiña-wiñaypä allin cawsayćhu canapä librupïpis chincachiyꞌari.k
Chuya nunacunäwan ćhulaśha amari cachunchu.
29 Tayta Diosllay,
ñacayćhu yaꞌa cäcäta salbaycallämay.
Llaquićhu cayäcäta śhalcachillämay.
30 Tayta Diospa śhutintamá taquicunawan alawäśhä.
Sulpäta ucuynïwanmá altuman juluycuśhä.
31 Chaynu lulaycuśhäpïmi Tayta Diosní mas-mastalä cushicunꞌapis.
Wäcacta uycuśhäpïtapis ütac shilluyu wälayu
malta wäcacta uycuśhäpïtapis mastalämari cushicunꞌa.
32 Chayta licalmá chaynu ñacä wacchacunäpis cushiculcanꞌa.
Tayta Diosta ashïcunäpa śhunꞌuncuna callpanchaculcanꞌamá.
33 Wacchacunäta Tayta Dios uyaliycunmari.
Ćhänalayä malcanta manamá unꞌaycunchu.
34 Lluy cawsäcuna,
janay pachäpis,
cay allpäpis,
lamarcunäpis Tayta Diosta alawapäcuy.
35 Sion malcactam Tayta Dios salbaycunꞌa.
Judapa malcancunactam caśhan śhalcachinꞌa.
Chay malcaćhu uywaynin nunancuna yaćhapäculmi tacyapäcunꞌa.
36 Aśhta chulincunactapis tücachinꞌamá.
Tayta Diosta cuyäcunämi chayćhu yaćhapäcunꞌa.