Lluy malcacunam Tayta Diosta alawan
Cuirdayu tucacuwan taquinapä; taquïcunäpa puydïninpämi.
67
Tayta Diosllay,
llaquipayculꞌari allinpä licaycälillämay.
Allin ñawiquiwan licayculꞌari
cuyacuyniquita camalaycälichillämay.
Selah
2 Chayurá jinantin pachäćhu caminuyqui lisiycuśha cachun.
Jinantin nasyuncunäćhu
salbacü caśhayqui yaćhaycuśha cachun.
3 Tayta Diosllay,
¡jinantin malcacunaca alawapäcuśhunqui!
¡Lluy nunacunaca alawapäcuśhunqui!
4 Malcacunaca cushicuypïta taquipäcuchun.
Anmá tincüninman-cama mandacunqui.
Anmá jinantin pachäćhu nasyuncunäta puśhaycunqui.
Selah
5 Tayta Diosllay,
¡jinantin malcacunaca alawapäcuśhunqui!
¡Lluy nunacunaca alawapäcuśhunqui!
6 Allpaca micuycunacta ishpiycachinmá.
Tayta Diosninchic allinpamá licaycamanchic.
7 Tayta Diosnillay,
allinpä licaycälillämay.
Jinantin pachäćhu cäcunaca paytari manchacuywan altuman juluycäliy.