sumä cushicuywan Tayta Diosta alawaśhun.

2 Sumä cayninpïta taquicunawan śhutinta alawaśhun.

Altuman juluycul alawaśhun.

3 Tayta Diosta nishun:

“Maynu äśhalayllaman camanamá lulayniquicuna.

Sumä jatun munayniquimanmi

ćhïnicüniquicunapis uyshucaycälimun.

4 Jinantin pachämá alawapäcuśhunqui.

Śhutiquitamá taquicunawan alawapäcuśhunqui” nil.

5 Tayta Diospa lulaśhancunacta licä śhapämuy.

Äśhalayllaman camana allinninchicpä cä lulaśhancunacta licapäcuy.

6 Lamarcäta chaqui allpamanmi muyüchila.^a

Mayunpamá awquillunchiccuna pasapäcula.

Tayta Diosllaćhümá cushiculanchic.^b

7 Paymá munayninwan wiña-wiñaypä mandacun.

Nasyuncunäpa cawsaynincuna ñawillanćhümá cayan.

Pasaypi juyu nunacunaca altuman juluycuśha manamá canmanchu.

8 Lluy malcacuna Tayta Diosninchictari allinpä licaycäliy.

Alawapäcuśhayquicunacta uyalichipäcuyꞌari.

9 Paymá cawsayniyüta caycachimanchic;

ćhaquinchictapis manamá lluchcaycachimälanchicchu.

10 Tayta Diosllay,

anmá imanuy capäcuśhätapis yaćhapaycälimälanqui.

Illayca sumä cananpä chulluchishancänümá chuyanchaycälimälanqui.

11 Trampacunamanmi palpälächimälanqui.

Sumä llasätamá ćhulcälälimälanqui.

12 Caćhaycälälimälanqui mayan nunacunapis munaśhanmannu jalutacalcämänanpämi.

Yacucunäpam,

ninacunäpam pasachipämälanqui.

Ñatac chaypïta allincämanmá julaycälimälanqui.

13 Taytallay,

chuya wasiquiman yaycuyculmá uywacunacta cañaywan uycapäcuśhayqui.

Limalicuśhätamá lulayculläśhä.

14 Ñacaycunaćhu cacuyalmari

shimilläwan chaycunacta limalicullalá.

15 Wira-wira uywacunactamá cañaywan uycapäculläśhayqui.

Wäcacunacta,

capishcunacta,

ulu uwishcunactamá uyculläśhayqui.

16 Tayta Diosta manchacuywan uyalicücuna śhapämul uyalipämay.

Yaꞌawan sumäcunacta lulaśhancunactamá willaycälishayqui.

17 Yaꞌapa shimí payllactamá ayacula.

Allüpis payllactamá altuman juluycula.

18 Sïchuśh śhunꞌüćhu mana allincunäta allinpänu licayaptiꞌa

Tayta Dios manaćhá uyaliycamanmanchu cala.

19 Aśhwanpa Tayta Diosꞌa uyaliycamälamá.

Mañacuyllätapis ćhasquiycamälamá.

20 Tayta Dios altumanꞌari juluycuśha cachun.

Mañacuylläta pay manamá “manam” nimälachu.

Cuyayninta manamá nïgamälachu.