LIBRO 2
Sal 42–72
Yacunäśhanümi Tayta Diosta ashiycun
Corepa milaynincunapä isquirbishan taqui; taquïcunäpa puydïninpämi.
42
Yacupi wañuyä luychu yacu ashïcänümá,
am Tayta Dioslläta ashiycullac.
2 Cawsayta uycü Tayta Diospïmi yacunäśhanu yaꞌa wañupacuyällá.a
¿Imayñatá Tayta Diospa ñawpäninćhu cayculläśhä?
3 Tutay muyun waꞌacuyllañamá micuynïpis.
Walan-walanmá:
“¿Maytá Tayta Diosniqui?”
nipayalcäman.
4 Achca-achca nunacunäta Tayta Diospa
alawana wasinman puśhaśhätamá yalpaycú.
Sulpäta ucuśhtin,
bïbaśhtinmi sumä cushisha lipäculá.
Caycunacta yalpalculmi sumä llaquicú.
5 Śhunꞌullay,
¿imapïmá jucmanyäśha cacuyanqui?
¿Imapïmá llaquisha cacuyanqui?
Tayta Diosllamanꞌari chalapacuy.
Payta alawaycuśhälämi canpis;
paymá salbaycamäní;
paymá Tayta Diosní.
6 Tayta Diosnillay,
śhunꞌullämi pasaypi
jucmanyäśha cayällan.
Chaymi amllamanña muspapacamullá
Jordan lädućhu cayalpis,
aśhta Hermon Mizar ulꞌucunäćhülä cayalpis.
7 Pächa yacuyqui apaliptinmá luli-luli
wayucunäpis yaćhapänaculcanlä canpis.b
Sumä mächicacamü wicapacamü yacucunämá ñitïlläman.
8 Cawsayta uycü Tayta Diosnïtamá mañacullá,
muyunpa cuyacuyninta Tayta Dios caćhaycamunanpä,
tutapañatac taquiynin yaꞌawan caycunanpä.
9 Wancanu cä Tayta Diosnïtam ní:
“¿Imapïmá unꞌämanqui?
¿Imapïtá llaquisha puliyäśhä?
¿Imapïmá ćhïnimänïcunap ñacachishan cayäśhä?”
nil.
10 Ćhïnimänïcuna tullücunacta
paquiyäcänümá usuchipäman;
walan-walanmá:
“¿Mayćhütá Tayta Diosniqui cayan?”
nipayalcäman.
11 Śhunꞌullay,
¿imapïmá jucmanyäśha cacuyanqui?
¿Imapïmá llaquisha cacuyanqui?
Tayta Diosllamanꞌari chalapacuy.
Payta alawaycuśhälämi canpis.
Paymá salbaycamäní.
Paymá Tayta Diosní.