Pampachaycunanpä, yanapaycunanpämi Tayta Diosta mañacun
David isquirbishan taquinapä.
25
Tayta Diosllay,
cawsaylläta
maquillayquimanmi ćhulaycamullá.
2 Tayta Diosllay,
amllamanmi chalapacú:
Pinꞌayman ćhaycunäta amari munaycuychu,
ćhïnicünïcuna asipapämänanta amari munaychu.
3 Rasunpa,
anman chalapacücunaca
manamá imaypis pinꞌayćhu caycunꞌachu.
Yanꞌalpi cuntran śhalcücunämi ichá uyshulächisha capäcunꞌa.
4 Tayta Diosllay,
caminuyquita lisiycachimay.
Munaśhayquimannu cawsanäpä yaćhaycachimay.
5 Rasun allinniquiman caminaycamay,
yaćhaycachimay.
Amllamá salbaycüní Tayta Diosllá canqui.
Imay timpupis amllamanmá chalapacullá.
6 Tayta Diosllay,
llaquipäcuyniquiwan
cuyacuyniqui wiña-wiñaypä caśhanta yalpayꞌari.
7 Ñatac müsu caynïćhu mana allincunacta,
juchacunacta lulaśhäta amañari yalpalcullaychu.
Tayta Diosllay,
llaquipayniquimannu,
cuyacuyniquimannu yalpalcallämay.
8 Tayta Diosꞌa tincüninman licaycü allinllamá.
Chaymi juchaćhu cäcunäta caminucta lisiycachin.
9 Mana nunatucüśha cäcunätamá allincäman caminaycunqui.
Allin śhunꞌuyücunätamá allin rasuncällacta yaćhaycachinqui.
10 Tayta Dios yaćhachishanta,
limalicuśhanta cäsucücunätá imaypis
cuyacuywanmi,
allincäwanmi licaycun.
11 Tayta Diosllay,
śhutiqui allin licaycuśha
canayquipäri jatun juchalläta pampachaycallämay.
12 Tayta Diosta cäsucücunätá,
paymi allin caminucta lisiycachil puśhaycun.
13 Chaymi allincällaćhu cawsaycunꞌa.
Milaynincunapis cay allpactamá
tücäninpä ćhasquiycälinꞌa.a
14 Cäsucünincunamanmá Tayta Dios śhunꞌunta quićhaycun.
Limalicuśhancunacta paycunamanmi lisiycachin.
15 Tayta Diosllämanmi ñawillätapis ćhulaycú.
Payllamá ima trampacunapïpis julaycamäní.
16 Licaycamal llaquipaycallämay.
Japallämi llaquisha cayällá.
17 Śhunꞌullämi masta-masta llaquishaña cacuyällan.
Cay llaquicuynïcunapi julaycallämay.
18 Cay pishipayllätawan llaquicuylläta
licayculꞌari juchäcunacta pampachaycallämay.
19 Ćhïnimänïcuna maynu-maynüña
licalïlälishanta licaycuyꞌari.
Micuna captinꞌa ñawinwanpis micälälimanmanćha.
20 Cawsaylläta libraycallämay,
ñawillayquićhu licaycallämay.
Amari pinꞌayman ćhaycachimaychu.
Amllamanmá chalapacamú.
21 Allincällamannu,
munaśhayquimannu
cawsaycuśhäcämi allinman yalaycachillämanꞌa.
Amllamanmá chalapacamú.
22 Tayta Diosllay,
lluy llaquicuyninpïtari
Israelta salbaycullay.