lulayta alli-allicta munapäcun?

¿Imapïmá mana tantiaycul uman chalaśhanta lulapäcun?

2 Cay allpäćhu mandacücunämá

Tayta Diospa cuntran śhalcapäcun.

Puydïcunämá aclacuśhancäpa cuntran śhalcapäcun:^a

3 “Cadinamäśhanchiccunäta laćhüśhun.

Ćhänalächimäśhanchiccunäpi libracuśhun” nil.

4 Janay pachäćhu cayäcäñatacmi paycunacta cushipan.

Tayta Diosmá paycunacta asipan.^b

5 Piñacülulñatacmi paycunacta millpülun.

Rabyacuyninwan chucchuycachilmá nin:

6 “Chuya Sion ulꞌümanmá mandacünïta

ćhulaycülú” nil.

7 Tayta Diospa camachicuynintamá willaycuśhä.

Paymá nimäla:

“Anmi chulí canqui.

Cananñatacmi yaꞌa Taytayqui cá.^c

8 Jinantin nasyuncunaca maquiquićhu

cananpä mañamay jinalla.

Cay allpap camacaynincamamá ampäña caycunꞌa.

9 Mandanayquipä jïrru bärayquiwanmi camacaycülunqui.^d

Cutuśh mancactanümá amshuy pawälunqui” nil.

10 Chayurá mandacücuna sumäta tantiaculcay.

Jinantin pachäćhu puydïcuna yanꞌalätac mana ćhasquïtuculcanquimanchu.

11 Manchacuywan Tayta Diosta sirbipäcuy.

Allinpä licaycul cushicuywan alawaycäliy.

12 Manchacuywan payman uyshuycäliy.

Yanꞌalätac piñacülul caminućhu wañülächishunquiman.

Payꞌa juclla piñacümá.

¡Maynu cushicuymi payman chalapacücunäpá!