Yanꞌal limaśhancunapïta Job pinꞌacüśham wanacun
42
Niptinmi Tayta Diosta Job nin:
2 “Tuquictam yaćhá ampa munayllayquićhu lluy imapis caśhanta;
ima lulay munaśhayquitapis manamá mayanpis manalcachishunquimanchu.
3 Am nimälanquimá:
‘¿Mayantá am canqui shimiqui chalaśhan
limayniquicunawan limapaynïta mana cäpa licanayquipä?’
nil.a
Mana tantiaśhäcunapïtamá yaꞌa nilá;
mana lisishá sumä cäcunäpïtamari limalá.
4 Am nimälanquim:
‘Canan nishacta uyalimay;
yaꞌa tapuptïmá amñatac niycamanqui’ nil.b
5 Ampïta uyaliyllam uyalilá;
cananñatacmi ichá ñawïwan licaycuc.
6 Chaymi lluy nishäcunapïta canan pinꞌacú;
allpäman ućhpäman taycucuyculmari wanacú” nil.
Punta caśhanpïtapis mastalämi Jobta Tayta Dios yanapaycun
7 Canan má,
chaynu Jobman lluy niyculmi Teman lädu Elifazta Tayta Dios nin:
“Sumä piñäśham amwan jinaman ishcay apanacuśhayquipä cayá.
Uywayní Jobnüchu manamá rasuncällacta yaꞌapïta am limalanqui.
8 “Canan anćhish wäcactawan anćhish ulu uwishta apaculcul uywayní Jobman lipäcuy.
Chayćhümi amcunap juchayquicunapi cañaywan uycälimanqui.c
Uywayní Jobñatacmi amcunapi mañacamunꞌa.
Chay mañacuyninta uyaliyculćha yaꞌapi yanꞌal limaśhayquipi pampachaycuśhayqui.
Amcuna manamá uywayní Jobnüchu rasuncällacta limapäculanqui” nil.
9 Niptinmi Teman lädu Elifaz,
Suja lädu Bildad,
jinaman Naamat lädu Zofar lipäcul Tayta Dios nishantanülla lulaycälila.
Tayta Diosñatacmi Jobpa mañacuyninta uyaliycula.
10 Chaynu apanacuśhancunapä Job mañacapuptinmi Tayta Dios caśhan yanapaycula.d
Punta capuśhanpïtapis chaynu juc mastalämi uyculapis.
11 Chayćhu lluy wawꞌi-caśhancuna,
panincuna,
unay lisinacuśhancuna Jobman śhapämulmi jatun cumbiducta lulapäcula.
Tayta Dios imaymana sasachacuycunacta pasachishanpïtamari cunsuylaycälil,
callpanchaycälil illayta,
jinaman ürupïta surtijacta-camapis uycälila.
12 Punta cawsayninpïtapis mas-mastalämá Tayta Dios Jobta altuman juluycula.
Chaymi ćhunca tawayu walanga (14,000) uwishnincuna,
süta walanga (6,000) camïllu uywancuna,
walanga (1,000) yundancuna,
walanga (1,000) ćhina aśhnuncunapis cala.
13 Walaśh chulincunapis anćhishlämi cala,
wamla chulincunapis quimsalämi.
14 Punta wamla chulintam Jemimae śhutiwan śhutichäla;
atimünintañatacmi Cesiaf śhutiwan,
atimünin quimsätañatacmi Keren-hapucg śhutiwan.
15 Jobpa tuquish-cama wamla chulincunanuꞌa manamá jinantin pachäćhu juccuna calachu.
Paycunaman tulincunactanümá ima cänintapis papänin Job tücaycachila.