41
“¿Leviatana nishan juyu manchanaśh uywacta ansuyluwan am chalälunquimanchun?
¿Puchcawan shiminta am watälunquimanchun?
2 ¿Sinꞌanpa watucta pasächinquimanchun imatá?
ütac ¿caquichcunta puntash ishtacawan pasächinquimanchun imamá?
3 ¿Llaquipaycunayquipä amta ruygacuśhunquimanchun imatá?
¿Tuquillapchun mañacuśhunquiman imamá?
4 ¿Uywayniqui wiñaypä cananpä
payta limalicachinquimanchun imatá?
5 ¿Pishuchawannüchun paywan awsacunquiman imamá?
¿Wamla chuliquicuna awsacunanpächun wataycülunquiman imatá?
6 ¿Lanticücunaca läsaćhu lanticulcanmanchun imamá?
¿Cuchulcul-cuchulculchun lanticücunaca aypunaculcanman imatá?
7 ¿Utanta cuchilluwan pasächinquimanchun imamá?
¿Challwa chaläcunäpa arponninwanpis umanta pasächinquimanchun imatá?
8 Payman maquiquita ćhulaycülulꞌa,
manamá imaypis unꞌaycunquichu;
manañamá yapa ćhulaycuyta imaypis munanquiñachu.
9 Yanꞌal-yanꞌalmi Leviatanta maquiquićhu uywayta munayanqui;
licalcuyllanwanmá nunacunaca manchacuypi anćhanpälälin.
10 Payllawanpis mana atipayalcalꞌa,
¿pitá yaꞌapa ñawpänïćhülä tacyaycunman?
11 ¿Mayantá mañayämänanpä imallactapis uycamäla?
Cay pachäćhu lluy-lluy cäcunaca yaꞌallapamá.
12 “Ñatac imaypis limayäśhämá Leviatanpa sumä ćhaquinpïta,
callpanpïta,
sumä caśhanpïta.
13 ¿Sumä anacü utanta mayanmá julülunman?
¿Mayanmá tita-tita aychanta pasächinman?
14 Quiluncunapis pilanu sumä manchachicuypä cayaptin,
¿mayanmá shiminta quićhaycunman?
15 Jïrru atajachicuwan-cama laꞌaśha cäcunänümi waśhanpis cayan;
sumä chalächisha-camamari luminu cayalcan.
16 Chaycuna sumä jucllachanacüśha cayaptinmi,
waywapis mana pasaycunchu.
17 Chaycuna quiquin-pula sumä chalanacüśha
cayaptinmi mayanpis manaña laquiyta atipanmanchu.
18 “Jächiwshiyaptin waclinümi shiminpïta yalamun;
ayllimuptin intip acchinnümi ñawincuna llipyan.
19 Shiminpïta nina walayämi yalamun,
śhanśhacunamá wicapacamun.
20 Sumä timpuyä mancapïta untay yalamücänümi,
sinꞌancunapïta untaycuna yalamun.
21 Jamalcuyllanwanmi śhanśhacunätapis latachin;
shiminpïtamá nina yalamun.
22 Cuncanćhümá sumä-sumä callpan cayan;
paypa puntanćhuꞌa mayćhüñapis chucchupäcunmá.
23 Lulï aychanpis anä-anä,
sumä-sumämi cayan;
mana cuyulï fundïsha jïrrunümari cayan.
24 Śhunꞌunpis wancanümá anä cayan;
tunay luminümá sumä-sumä cayan.
25 Pay śhalcuptin puydïcunaca chucchupäcunmá;
tapsipacuptin ayiytamá allacaycälin.
26 Payta ispäda ćhäluptin manamá imananpischu;
manatacmá lansapis,
flïchapis nï imapis yaycunchu.
27 Paypá jïrrupis päśhanüllamá;
brunsipis ismüśha cullunüllamá.
28 Flïchacunäpi pay manamá ayinchu;
waracawan ćhächishan lumicunäpis paypá päśhacunänüllamá.
29 Ima armacunapis paypá üśhawan chiquichäśhannüllamá;
lansa ćhächishanpa suynayninpïpis pay asicunmá.
30 Patanćhu puntash-cama jïrrunu cäcunämi,
ñïcäpa puliptin śhucactanülä quićhälunpis.
31 Lamarman jiꞌalpulpis timpuyä mancactanümá timpüchimun;
llümicta mancaćhu ayćhiyäcänümá ayćhïlun.
32 Yacunta lil chipyayä pushumaytanümá laśhćhuntapis caćhaycülun;
yulä ächactanümá śhucaypa-śhucal caćhaycülun.
33 Cay manchanaśh uywanuꞌa jinantin pachäćhu juc manamá canchu;
payꞌa imactapis manamá manchacunchu.
34 Payꞌa sumä munayniyütucücunätapis mana cäpämá lican;
payꞌa lluy-lluy uywacunapïpis sumä puydïninmá” nil.