2 “Cananpis nana-nanay shimïwanmi limalicuśhä.

Masqui maynüpa apalcaćhaptïpis Tayta Dios maquinta jinallalämi ćhulaycayäman.

3 Maylä yaćhälüman mayćhu yaćhaśhantapis,

chay dispächunmanćha pasacüman.

4 Paypa ñawpäninmanćha caynu caśhäta ćhulaycüman;

manya-manyapïćha lluy-lluyta niycülüman.

5 Imapi caśhanta niycamänantapis yaćhaycümanćha;

ima nimäśhantapis tantiaycümanćha.

6 Pay,

¿munayninman atinïduchun cuntrá śhalcülunman?

Manamá.

Payꞌa cällanmanmá licaycamanman.

7 Chayćhüćha quijacünin nishanca rasunpa caśhanta tantiaycunman.

Chayćhüćha cäraycünïca wiñaypä libriña canäpä niycamanman.

8 “Ñatac inti ishpimunan lädućhu ashilpis manamá talïchu;

inti jiꞌalpunan läduman lilpis manatacmá licächu.

9 Nurti lädućhu ashilpis manamá talïchu;

sur läduman lilpis manatacmá licächu.

10 Paymi ichá imanuy cawsaśhätapis tuquicta lisiyäman;

sasachacuycunap pasaycachimaptinꞌa ürünümá chuya-chuya yaluycuśhä.

11 Tayta Diospa laśhćhunmanmá ćhaquí jaluycula;

mana japächacullalmi pay caminaycamäśhallanćhu tacyayculá.

12 Pay nimäśhanpi,

yaćhachimäśhanpi manamá japächaculächu.

Aśhwanpa micuycäpïtapis mas ćhaniyüninpälämi śhunꞌüman ćhulayculá.

13 “Chaynu captinpis Tayta Dios lulay pinsaśhanta ¿mayanmá manalcachinman?

Payꞌa,

ima lulay munaśhantapis lulälunmá.

14 Chayurá yaꞌawan ima lulay munaśhantapis lulaycunꞌamá;

ima lulayta pinsaśhancunactapis yaꞌawan mastalämá lulaycunꞌapis.

15 Chaymari ñawpäninćhu chucchuyällá;

payman yalpaćhacul sumä-sumämá catcatayäpis.

16 Tayta Diosmá jucmanyächiman;

sumä munayniyücämari ćhinaśhyächiman.

17 Chaynu cayaptïpis,

tutawyayca manalämá chincächimanchu.

Sumä-sumä yanawyayä tutapay ñitilämäca manamá upällachimanꞌachu.