2 “¿Imaycamañatan umäta nanayächimanqui?

¿Imaycamañatan nanay shimiquiwan

ćhaypa-ćhayächimanqui?

3 Ćhuncactapis ñamá palämanquiña;

jamuyayämänayquipä ¿manañachun pinꞌacuyniqui can imatá?

4 Masqui juchayu rasunpa cayalpis

quiquïćha imanuypis cacuśhä.

5 Amcuná yaꞌapïpis mas allintuculcanquimá.

‘Juchayquipïtam uyshulächisha cayanqui’ nilmá caraycayalcämanqui.

6 Má yaćhapäcuy,

quiquin Tayta Diosmá camacaycäman.

Paymá trampanman palpächiman.

7 “Yanapämänanpä apalcaćhaptïpis manamá mayanpis yanapaycamanchu.

Maynu-maynu ayacuptïpis manamá pipis tincüninman allichaycamanchu.

8 Manaña pasanäpä Tayta Diosmá caminüta wićhälun.

Pulinäcäta pasaypi tutapämanñamá muyüchin.

9 Altuman juluycuśha caśhäcäpïtamá wicapäman;

puydï caśhäcäpïtamá alapacäman.

10 Lantactanümá lluy-lluy camacaycäman;

ima alcaśhätapis sapipïmá lluy cuchüman.

11 Piñacuynin yaꞌaćhu-camamá licalin.

Ćhïnicünintanüñamá licayäman.

12 Lluy pilyänincunamá cuntrá śhälälimun.

Yaćhaśhäcäpa muyülïnïmanmá cunćhacaycälimun,

camacaycüní yaycapämunanpä.

13 “Tayta Diosmá ayllücunacta yaꞌapïta japächälun.^a

Apanaculcäśhäcunactapis yaꞌapïta calupalcachilmá,

mana lisishactanüña licaycachiman.

14 Lluy ayllücuna caćhaycämanñamá.

Apanaculcäśhäcunapis unꞌälälimanñamá.

15 Wasïćhu yaćhäcunäpis,

yanapämänïcunapis manañamá lisïtuculcämanñachu.

Jamapacü nunallactanüñamá licapämanpis.

16 Yanapäní nunacta mañacuptïpis manañamá uyaliycamanchu;

masqui maynüpa mañacuptïpis manañamá cäsumanchu.

17 Jamayllätapis walmí millachicamanñamá;

ayllücunapäpis pasaypi millachicuyninñamá cayá.

18 Uchuchäcunällapis jamuyapämanmá;

licämal-pachamá yaꞌapïta mana allinta limapäcun.

19 Sumä apanacüśhäcunäpis licaytapis manañamá munapämanchu;

anchap cuyaśhäcunäpis cunträñamá muyucalcälin.^b

20 Aychäwan utancunapis tullümanñamá lluy laꞌacacälälin;

wañuy-cawsayñamari cawsayällá.

21 Apanaculcäśhäcuna,

llaquipaycälillämayꞌari.

Tayta Diospa maquin ćhämäśhanpïta llaquipaycälillämayꞌari.

22 Amcuna,

¿imapïtá Tayta Diosnu aticaćhayalcämanquilä?

¿Manañachun caynu-caynüpaña jächiyalcämalpis jawcayapäcunqui imamá?

23 “Maynu allinćha canman cay limaśhäcunäta mayanllapis isquirbiycuptinꞌa.

Ima allinlä canman pitwïsha isquirbinaman lulaycuptinꞌa.

24 Allinćha canman mayanllapis sinsilwan,

plümuwan

imaypis mana chincäta lumiman isquirbiycuptinꞌa.

25 Ñatac yaꞌa tuquictam yaćhá libramäní cawsaśhanta.

Paymá cay pachäćhu yaꞌacta śhalcaycamanꞌa.

26 Masqui cay aychá ismulcul uchuy-uchuylla

palpüluptinpis,

cawsaynïćhu Tayta Diosta licaycuśhämá.

27 Awari,

yaꞌa quiquïmá ñawïwan licaycuśhä,^c

Caypïmari śhunꞌullá sumä-sumä wañupacuyan.

28 “¡Amcunap cärayqui cañälächun aticaćhapämänayquipä!

¡Imanuypatá lluy caycuna quiquïpa juchäpi caśhanta niyalcämanquiman!

29 Ñatac quiquiquicuna mućhuchicuypi licaculcay.

Tincüninman cäraycücämi mana allincunäta

camacaycunanpä ispädawan śhacayämun.

Cäraycuna muyun caśhanta yaćhapäcuyñari” nil.^d