2 “¿Imaycamañatá limay-limay cayanqui?

Limayta munalꞌa,

sumätalä tantiapacuycuy limananchicpä.

3 ¿Uywachun cayalcá imatá chaynu limapapämänayquipä?

¿Lucluctanüchun licayalcämanqui imatá?

4 ¿¡Sumä piñacuśhayquiwan quiquiqui camacacuśhayquipïchun

cay allpaca chunyanꞌa imatá!?

¿Am-laycuchun,

aꞌacunäpis caśhancäpïta aśhupäcunꞌa imamá?

5 “Awari,

mana allin nunacunäpa acchin wañunꞌamá;

ninanpis manañamá walanꞌachu.

6 Michïrunpis wañucalpunꞌañamá;

wasinćhu acchinpis tutayacalpunꞌañamá.

7 Sumä callpasapa caśhanpis camacacalpunꞌamá;

quiquinpa lulay munaśhancunällamá cunca cuchuyninpis caycunꞌa.

8 Ćhaquinpis trampamanmá palpachinꞌa;

chay trampaćhümá ćhänalächinꞌa.

9 Ancunpïtamá läsuca chalacacülunꞌa;

pasaypipä chalacacüśhamá quïdälunꞌa.

10 Pampäćhümá trampaca pacäśha cayan;

pasayaptin chalananpämá trampaca alcayan.

11 “Mayćhu captinpis manchacuycällañamá muyülïninćhu muyuyan;

mayta liptinpis manchacuycällañamá aticaćhayan.

12 Micuycäpïñamá callpanpis manaña canñachu;

sasachacuycäpis janäninćhüñamá cayan.

13 Ishyaycämá aychanta micuyan;

wañuycämi maquintawan ćhaquinta camacayan.

14 Wasinćhu jawca cawsayninpïpis wicapäśhamá canꞌa;

manchanaśh tutawyäcäpa mandäninmanmá munäta mana munäta aysaśha canꞌa.

15 Ninallañamá wasinćhu muyuyanꞌa;

yaćhaśhanćhu asufri walayällañamá mallulayanꞌa.

16 Sapincunamá lulïninpa chaquipäcunꞌa;

pallaynincunamá janäninpa awipäcunꞌa.

17 Cay allpäćhu manañamari yalpalcuśhachu canꞌa;

malcacunäćhu śhutinpis manañamari limalcuśhachu canꞌa.^a

18 Acchïpïta jululcul tutawyaycäman wicapalpüśhamá canꞌa;

cay pachäpi alapacüśhamá canꞌa.

19 Malcanćhu manañamá chulinpis,

willcanpis quïdanꞌañachu;

wasinćhu manañamá cawsayniyu pillapis quïdaycunꞌañachu.^b

20 Chaynu pasaśhanta yaćhälälilmi inti ishpimunanpi

aśhta inti jiꞌalpunancama nunacunaca sumä-sumä chucchupäcunꞌa.

21 Chaynümari mana allin nunacunaca camacapäcunꞌa;

chayćhümari cawsapäcunꞌa Tayta Diosta mana lisï nunacunaca” nil.