Chaymi jacyalpunäpä munaśhä-munaśhämannüña quijacuśhä.

Sumä sinticüśha śhunꞌüwanmari limalicuśhä.

2 Tayta Diostam nishä:

Ama juchachämaychu.

Aśhwanpa tantiaycachimay yaꞌawan imapi caynu lulaśhayquitapis.

3 Quiquiqui camacuśhayquita ¿caynüpaña ñacachimäśhayquica allinchun imatá?

Ñatac ¿mana allin nunacunaca lulapäcuśhanta,

licapäśhayquicá allinchun imamá?

4 ¿Nunacunäpa ñawinnüllachun imamá ñawiqui?

¿Nunacunaca licaśhannüllachun licayanqui imatá?

5 ¿Nunacunäpa cawsayninnüllachun cawsayniqui imamá?

¿Nunacunäpa watancunanüllachun watayqui imatá?

6 Chayurá ¿imapïmi mana allinnïcunacta taliyta jicutayanqui?

¿Imapïmá juchäcunacta ashipayämanqui,

7 juchasapa mana caśhäta tuquicta yaćhayal,

jinaman maquiquipïta salbaycamäní mana pipis caśhanta yaćhayal?

8 Quiquiqui maquiquiwan lulaycamalchun,

¿cananñatac camacämayta munayämanquiman?

9 Yalpayꞌari ñiꞌipi licalichimäśhayquita.

Chaychun,

¿canan allpaman caśhan cutiycayächimanquiman?

10 ¿Manachun lichicta cuwajalcul quïsucta luläcänu

cay aychäta lulaycamälanqui imamá?

11 Awari,

cay aychawan utawanmi müdaycachimälanqui.

Tullücunactawan ancücunactapis tuquictamá shimpaycamälanqui.

12 Cawsaytawan cuyacuyniquitam uycamälanqui.

Ñawillayquićhümi cawsaycachimälanqui.

13 Cananmi ichá śhunꞌuyquićhu

imacta pacalächishayquitapis tantiaycú:

14 Allinta ütac mana allinta lulaśhätamari licapayämälanqui.

Juchacta luläluptiꞌa mućhuycachimanquimanmá cala.

15 Juchayu calꞌa imanuylä yaꞌa cayculläman.

Masqui mana juchayu cayalpis uyshuläcuśhä jinallamari.

Pinꞌacuywan ñitïsham cayá;

llaquicuywan shipüśham cayá.

16 Umäta pallalcuptïpis liyunnümá aticaćhamanqui,

munayniquiwan imactapis lulamänayquipä.

17 Yaꞌapa cuntrá niycamänayquipämi ima achäquictapis ashiyanqui.

Masta-mastalämari pilyäcunänu cuntrá capäcunanpä śhalcatityayächinquipis.

Piñacuyniquitapis masta-mastañamari wiñayächinqui.

18 “Chaynu cayaptinꞌa,

¿imapämá mamäpa patanpi julamälanqui?

Mana pipis licamäśhancama wañucüman cala.

19 Mamäpa patanpi yalämul-pacha sipultüraman liculꞌa,

mana cawsänüñaćh cäman cala.

20 ¿Manachun ash timpullaña cawsayní quïdayan imatá?

¡Caćhaycamayñari!

Ashllactapis jawcayayta taliycunäpä yaꞌapïta aśhucuyñari.

21 Manaña imaypis cutimü linäcäman manalä liyaptí,^a

tutawyä yanawyayäcäman manalä liyaptí,

22 pasaypi yanawyayä itiwyayä malcaman manalä liyaptí,

mancap siquinnu cä acchinpis yanawyayä

malcaman manalä liyaptí,

caćhaycamayñari” nil.