Nehemías
Nehemiaspi Isquirbishan
Jerusalenpämi Nehemias mañacun
1
Hacaliaspa chulin Nehemiaspa willacuśhan caynümi:
Artajerjesa ishcay ćhunca (20) wata mandacuśhanćhümi Quisleu quillaćhu Susa malcap palasyunćhu yaꞌa cayälá.
2 Chaymanmi wawꞌi-caśhá Hanani Juda lädu waquin nunacunawan ćhämun.
Chaymi Jerusalenpïtawan prïsu apananpi quïdäcunaca imanuy capäcuśhantapis tapuyculá.
3 Chaymi nipämäla:
“Prïsu puśhaśhanpi Jerusalenćhu quïdäcunämi sumä ñacayćhu,
pinꞌayćhu cayalcan.
Jerusalenpa murällancunapis lluy tunïshamari cacuyan.
Puncuncunapis lluy cañaywan camacaycüśhamá cayan” nil.
4 Chayta uyalïlul-pacham taycucuycul waꞌaculá.
Achca muyun llaquillaćhu cayalmari ayunaśhtin janay pachäćhu cä Tayta Diosta mañaculá.
5 Caynümi nilá:
“Limalicuśhayquita lulaycü Taytallay,
cuyaśhüniquicunactawan yaćhachicuyniquita cäsucücunäta llaquipaycü,
sumä manchay janay pachäćhu cä Tayta Diosnillämari am caycunqui.
6 Cay Israel lädu nunallayquicunapä tutay muyun mañacuśhäta licaycallämayꞌari,
uyaliycallämayꞌari.
Awari,
lluy Israel läducunämi ampa cuntrayqui mana allincunacta lulapäculá;
aśhta yaꞌapis wasintinmi mana allinta lulapäculá.
7 Ampa cuntrayqui lulalmari pasaypi-cama cawsapäculá.
Nunayqui Moiseswan upämäśhayqui yaćhachicuyta,
camachicuyta,
nipämäśhayquita manamá cäsuculcälächu.
8 Ñatac nunayqui Moisesman nishayquitari yalpalcullay:
‘Juchacta lulapäcuptiquiꞌa jinantin malcacunämanmi chiꞌichishayqui.b
9 Ñatac yaꞌaman cuticalcämul yaćhachicuynïta cäsucul lulayman ćhulapäcuptiquiꞌa cay pachap sapinćhu chiꞌisha cayaptiquipis cutichipämuśhayqui yaćhapäcunayquipä unanchaśhá allpamanmi’ nil.c
10 “Sumä munayniquiwan,
sumä maquiquiwan libraycuśhayqui malcayqui,
nunayquimari capäcullá.d
11 Taytallay,
ama chaynu callaychu yaꞌactawan lluy nunallayquip mañacuynintari uyaliycälillämay.
Lluypis amta altuman juluycuyllactamari munapäcú.
Cay nunallayqui ima lulaśhanćhüpis allin caycunanpäri yanapaycallämay,
jinaman mandacücäwanpis allinpä licaycachillämay” nil.
Chay timpućhuꞌa mandacücäpa bïnu sirbïnincunap puydïninmari calá.