Alawana wasicta allichachiptin ćhïnicünincunam manalcachin
4
Chayćhu Babiloniapi cutimücuna Israelpa Tayta Diosninpa alawana wasinta śhalcachishantam Judapa Benjaminpa ćhïnicünincuna yaćhälälin.
2 Jinalmi Zorobabelman,
ayllucunap puydïnincunaman paycuna lilcälil nin:
“Yaꞌacunapis śhalcachiyta yanapapäcuśhayquim.
Amcunanümari yaꞌacunapis Tayta Diosniquita alawapäcú.
Asiriap mandacünin Esar-hadon cayman puśhapämäśhanpïtam cañaywanpis uycälí” nil.a
3 Niptinmi Israel lädu Zorobabel,
Jesua,
jinaman ayllucunap puydïnincuna nipäcun:
“Tayta Diosnïpa alawana wasinta manamá amcunawan allichachwanchu.
Persiap mandacünin Ciro nipämäśhannümari Israelpa Tayta Diosninpa alawana wasintá yaꞌacunalla allichapäcuśhä” nil.
4 Jinaman chay lädućhu yaćhä nunacunaca jucmanyachipäcula,
ćhinaśhyachipäcula Juda läducunaca lulayta manalcapäcunanpämari.
5 Chaynütac waquinnin licaycünincunactapis pacallap pägäluptinmi lulapäcunanpä manalcachila.
Caynu cala Persiap mandacünin Ciro allaycuśhanpi aśhta Dariop mandacuynincamam.
6 Chaynütacmi Asuerob mandacuyta allaycuyaptinpis Judapa Jerusalenpa cuntran ćhïnicünincuna tumpapäcul cartacta apachila.
7 Chaypïta Persiap mandacünin Artajerjesc timpućhüñatacmi Bislam,
Mitridates,
Tabeel,
jinaman waquin puydï-masincunawan Persiap mandacünin Artajerjesman cartacta apachipäcula.
Chay carta arameo limayćhu isquirbisha cayalpis Persa nunacunaca tantiapäcunanpämi ticlachisha cala.
8 Jinaman mandacücäpa puydï yanapänin Rehummi,
isquirbïnin Simsaiwan mandacü Artajerjesman apachila Jerusalenpa cuntran isquirbïsha cartacta.
9 Chay cartacta apachipäcula puydï yanapä Rehum,
isquirbï Simsai,
paycunawan cä caminaycücuna,
puydïcuna,
pilyäcunap puydïnincuna,
jinaman Erec lädupi,
Babiloniapi,
Susapi ütac Elam lädu mandacücuna,
10 chaynütac sumä munayniyu Asnaparpa Samariaman puśhachishan malcacuna,
Eufrates mayup chimpan inti jiꞌalpunan lädućhu cä malcacunäpis.
11 Chay apachishan cartaćhu caynümi nila:
“Mandacü Artajerjes,
limaycälimuc Eufrates mayup chimpanćhu cä nunayquicunam.
12 Mandacü taytay,
Jerusalenman caćhamuśhayqui Israel läducunämi pasaypi mana uyalicü cullu linlicunaca malcanta caśhan śhalcachicuyalcan.
Simintuncunacta ćhulayculñamari pilayta allacaycälin.
13 Jinaman Taytay,
cay malcacta allichalcul pilancunactapis caśhan śhalcalcachilꞌa manañam munapäcunꞌañachu alcabälacunacta,
nï ima camachishayquita pägaytapis.
Jinaptinmi mandacuyniquićhu illay juntuchishayquipis mirmanꞌa.
14 Yaꞌacuna am mandacünïpa nunayquicuna cayalcalmi caynüpa jalutacuśhunayquita mana munapäcüchu.
Chaymi cay cartacta anman apayalcächimú.
15 Punta mandacücunap ima lulaynincunapis isquirbisha caśhanćhuꞌari sumäta licaycuy.
Chayćhüćha taliycunqui cay malcaca maynu cullu linli capäcuśhanta,
jinaman mandacücunäta,
malcacunäta mana allinman ćhächipäcushantapis.
Licaycunquimari punta timpucunapïta cuntran śhalcalcälil-śhalcalcälil capäcuśhanpi pampaman muyuchisha caśhantapis.
16 Chaymi am mandacülläman willaycälic,
sïchuśh cay malcacta allichäläliptinꞌa murällantapis caśhan śhalcälächiptinꞌa Eufrates mayup chimpan inti jiꞌalpunan lädu malcacunaca manañam maquiquićhüñachu canꞌa” nil.
17 Nichiptinmi mandacü Artajerjes caynu isquirbila:
“Mandacücäpa puydï yanapänin Rehumtam,
isquirbï Simsaitam,
Samariaćhu yaćhä lulawshï-masincunactam,
Eufrates mayup chimpanćhu cä malcacunätam limaycälimuc.
18 Chay carta apachipämuśhayquita ñawpänïćhu lïgiptinmi limaynïcunaman ticlachisha cala.
19 Imanuy malca caśhantapis sumäta licaycälinanpämi camachilá.
Chayćhümi rasunpa taliycälí nipämäśhayquinu mandacücunap cuntran śhalcapäcuśhanta,
jinaman pipapis cuntran śhalcuyalcä-śhalcuyalcä malca caśhanta.
20 Chaynütac Jerusalenćhu mandacücuna sumä munayniyu capäcuptinmari Eufrates mayup chimpan läducunäpis maquillanćhu cacuña.
Jinaptinmi paycuna imaymana alcabälacunacta pägapäcuña.
21 Chaynu cayaptinꞌa manaña lulapäcunanpäri chay nunacunäta camaycachiy.
Yaꞌa niptïñamari caśhan śhalcachisha canꞌa.
22 Cay mandacuyní sasachacuyman mana ćhänanpä canan-pachari camachishäta cumplichiy” nil.
23 Caynu mandacü Artajerjes carta apachishanta Rehumpa,
Simsaipa,
isquirbïcäpa,
lulawshï-masincunap ñawpäninćhu lïgiycuptin-pacham Jerusalenman juclla mana-mana paćhcatityalcul Israel lädu luläcunäta munäta-mana munäta manalcachipäcula.
24 Chaynüpamari Tayta Diospa alawana wasin śhalcachïcunäta manalcachipäcula Persiap mandacünin Dario ishcay wata mandacuynincama.