Uycuna patactam caśhan śhalcachin
3
Chaynu anćhish quilläćhu Israel caśhtacunaca malcanćhu-cama yaćhayalcalñam jinantin Jerusalenman juc nunanülla juntunaculcäla.a
2 Chayćhümi Josadacpa chulin Jesua sasirdüti-masincunawan,
jinaman Salatielpa chulin Zorobabel lluy aylluncunawan Israelpa Tayta Diosninpa uycuna patacninta śhalcachiyta allaycapäcula,
Diospa nunan Moises camachishanmannu chayćhu uycälinanpä.b
3 Masqui chay lädućhu yaćhä nunacunäta manchacuyalcalpis uycuna pataccäta unay caśhallanćhümi sumäta caśhan śhalcachipäcula.
Jinalculmi chayćhu wälanpa tardinpa muyun-muyun Tayta Diosman cañaywan uycapäcula.c
4 Chaynütacmi camachicuy nishanmannu jatun Chucllachacuy Fistactad lulapäcula.
Chay fista muyuncunaćhu lulananmannütacmari cañaywan uycunacunactapis uycapäcula.
5 Chaynütacmi uycapäcula:
walan-walan cañaywan uycunacunaćhu,
llullu quillaćhu,
Tayta Dios japächaśhan sumä fistancunaćhu,e
jinaman śhunꞌunpi yalamücunätapis uycapäculamari.
6 Anćhish quillap allaycuy muyunninpïtamari Tayta Diosman cañaywan uycuyta allaycapäcula masqui alawana wasi manalä simintäśha cayaptinpis.
7 Má,
chay Persiap mandacünin Ciro nishanmannümari lulaycula.
Wasi luläcunäman,
ilupi aläja luläcunäman illaytam pägaycula.
Jinaman Tiro,
Sidon läducunämanñatacmi micuyta,
asayticta,
bïnucta pägaycula.
Paycunamari Libano lädupi aśhta Jopecama lamarninpa cedro ilucunäta apapämula.
8 Chaynu Jerusalenman cutipämuśhanpi ishcay watap ishcay quillanćhümari Tayta Diospa alawana wasinta śhalcachiyta allaycapäcula Salatielpa chulin Zorobabel,
Josadacpa chulin Jesua.
Paycunactam yanapapäcula sasirdüticunaca,
levitacunaca,
jinaman prïsu puśhaśhanpi lluy cutimücunäpis.
Paycunamari ishcay ćhunca watayüpi janaman cä levitacunäta alawana wasicta śhalcachïcunäpa licäninpä ćhulaycapäcula.
9 Chay alawana wasinta luläcunäpa licaycüninmi capäcula Jesua chulincunawan,
aylluncunawan,
jinaman Juda lädu Cadmiel chulincunawan,
chaynütac Henadad chulincunawan,
aylluncunawanpis.
10 Luläcunaca Tayta Diospa alawana wasinta simintapäcuptinmi sasirdüticunaca sasirdüti müdananwan müdacälälisha curnitillayü-cama chay capäcunancäćhüña cacuyalcäla.
Chaynütacmi Israel lädup mandacünin David camachishanmannu Asafpa milaynin levitacunäpis latilluyü-cama Tayta Diosta alawapäcunanpäña cayalcäla.f
11 Lluy-lluymari Tayta Diosta sulpäta uculcäla.
Waquinninmi alawapäcula:
“Tayta Dios sumä allinmi.
Israelta wiña-wiñaypämi llaquipaycun” nil.g
Chaynu Tayta Diospa alawana wasinta simintapäcuptinmari jinantin malcaca sumä cushicuywan Tayta Diosta alawapäcula.
12 Masqui waquinnincuna cushicuypi apalipäcuptinpis,
punta alawana wasicta licä yaśhannin sasirdüticunaca,
levitacunaca,
ayllucunap puydïnincuna alawana wasip simintaśhanta licapäculmi apalcaćhaypa waꞌaculcäla.
13 Chaynu nunacunaca jinapäcuptinmi mana tantiapaśh cala,
mayannin cushicuypi ütac llaquicuypi apalcaćhapäcuśhanpis.
Chay jinapäcuśhancunaca calu-calumanmari uyalisha cala.